A gara ladronnan den accion purbando pa horta piesa di auto

Nan tabata mas, pero por lo menos e dosnan aki no a core e mesun suerte cu e demas miembronan di e gang di ladronnan di piesa di auto. Polis a yega gara dos homber den accion, purbando pa horta piesa di un auto marca Chevrolet modelo Optra color shinishi cu number A-73738 para riba acera den Bushistraat. E dos sospechosonan ta den man di husticia awo y a hiba nan dilanti un Fiscal Auxiliar pa splica kico tabata nan intencion.

Awe tardi pa 2:30pm, Polisnan di Oranjestad a para careda di un grupo di homber cu ta pasa den bario buscando piesa di auto pa horta. Ta parce cu den Bushistraat nan a topa cu un auto cu ta cuadra cu nan necesidadnan y a pensa di bay horta piesa. Nan mes a yega den un Hyundai relativamente nobo y a puntra bisiñanan eybanda si e auto ta di nan. Esey ta cuadra cu e formula conoci pa horta auto. Ora a bisa cu no, mesora nan a añadi cu e doño di auto a duna nan permiso pa coi piesa di e auto.

Polis a gara ladronnan di piesa di auto den accion. A gara nan den intencion pa horta piesa di un auto marca Chevrolet modelo Optra staciona riba acera den Bushistraat.

Polis a gara ladronnan di piesa di auto den accion. A gara nan den intencion pa horta piesa di un auto marca Chevrolet modelo Optra staciona riba acera den Bushistraat.

Posted by 24ora on Saturday, July 4, 2020

Sinembargo, ora cu a pone e doño di auto na altura di intencion di e ladronnan aki, mesora el a bati alarma na Polis cu a presenta. Net ora Polis a yega a topa cu e dos hombernan mishiendo cu e auto cu tools den man, cla pa cuminsa desarma e auto for di otro. Ora Polis a puntra nan pa papelnan di e auto y pa demostra cu e auto ta di nan, mesora a bira nervioso y no por a contesta e preguntanan. Nan ni sikiera tin nomber di e doño di auto cu supuestamente a duna nan permiso pa hiba e auto pa piesa.

E auto tabata di studiantenan di Xavier University cu a regresa nan pais debi na e Pandemia. Pues e auto tin como tres luna para riba acera sin move y a lag’e pa e doño di e apartamentonan eynan. Claro cu di pafo e auto ta mustra bandona y cu casi lo no ta core mas. Ta e tipo di autonan bieu cu studiantenan ta cumpra pa un prijs barata pa por move rond cu ne durante nan estudio na Aruba.

A detene ambos sospechoso di ladronicia di auto of di piesa di auto pendiente un investigacion. E doño di auto a keda di pasa pa entrega keho tambe contra e ladronnan aki den Ponton. Testigonan a menciona di ta mira nan pasa den auto coriendo pocopoco y ta loer den cas y cura di hende pa busca cos pa horta. Pero awe bon coordinacion entre bisiñanan, doño di e auto y Polisnan cu a activa mesora, a logra frustra un intento di ladronicia.