Den cuadro di nan celebracion di 65 aña di existencia e aña aki, Emmaschool a celebra ayera cu no menos di 27 alumno di 13 pa 14 aña cu a caba klas 6 of 7 cu exito y asina ta cla pa pasa pa un scol “mas grandi”. Tur lo sigui studia awo na Scol Practico pa Ofishi (SPO) pa tres aña pa despues sigui pa EPB.
Cabesante di e scol hunto cu docentenan a tene un celebracion special, aunke chikito y limita, pa e 27 alumnonan aki na Marina Pirata Restaurant. Ey nan a come un dushi cuminda di lama, a haya chens pa combersa informal cu otro y cu docentenan, pa despues tuma nan certificado di scol.
Emmaschool ta situa na Ayo y tin mas o menos 130 alumno parti den 13 klas, cu ta inclui un klas special di Scol Scucha Nos, pa alumnonan cu deficiencia di oido. Ta bon pa enfatisa cu Emmaschool ta un scol basico special, na Hulandes considera un scol pa “moeilijk leerende kinderen”. Muchanan cu ta bin na remarca pa drenta un scol special, manera Emmaschool, ta alumnonan cu a confronta retonan cu idioma Hulandes of enseñansa na un scol basico regular ta bay mucho lihe pa nan of cu den nan bida a confronta un accidente cu a conduci na deficiencia, manera cu bista y oido.
Pa mustra e exito di e programa y e forma profesional con e docentenan ta presenta e curiculo na e alumnonan, por menciona cu e miho gradua e aña aki na EPB, ta Byron Lesire, kende tabata un alumno na scol basico Emmaschool. El a continua den e programa di SPO y despues a drenta EPB bon prepara, te cu el a caba cu e miho puntonan di e scol. Su deseo ta awo pa sigui pa EPI, caminda cu e retonan ta un poco mas, pero no ta imposibel si!
Durante e celebracion di e graduadonan di Emmaschool, a reconoce tres alumno cu a sobresali entre e 27 nan cu a caba e scol cu exito. Ta trata aki di Jenileen Rosario di Grupo 7B cerca Juf. Linda Bos; Iviany Aburto Rodriquez, di Grupo 7A (e mas chikito di e drieling na scol) cerca Juf. Zuleika Wever y Yulaisha Tromp di Grupo 6 cerca Juf. Lysah Lo. Tur a haya un regalito for di man di Cabesante di Emmaschool, esta Juf. Joselyne Oduber.
