For di basta tempo caba minister di enseñansa a anuncia cu Commandeur Pieter Boerschool lo cambia di nomber pa Scol Basico Xander Bogaerts, honrando asina un yiu di tera cu a yega hopi leu den bida, den e caso di e hoben deportista aki, den mundo di baseball profesional na Merca.
Den un ceremonia caminda e astro Arubiano tabata e figura central, hunto cu alumno y maestronan di dicho scol y demas invitado, a devela e nomber nobo di e edificio.
Bogaerts tabata hopi emocional durante e develo di nomber nobo di e scol, unda cu por a nota cu hasta lagrima e tabata tin na su wowonan. Bogaerts mes a bay dicho scol, y a comenta di ta sumamente contento di ta eynan y honra cu e merito aki.
Den un discurso e ta conta di tempo e tabata mucha bayendo e scol aki, gradiciendo e maestronan cu a sa di duna e y su ruman homber les, como tambe el a gradici su mama y su famianan, mencionando tambe algun anecdota di su bida prome cu el a bira un hungado profesional, cu awe, tin un scol cu ta carga su nomber. E dia di awe tabata un dia hopi special pa Bogaerts. Tur cos cu el a logra den baseball, ningun e no por a imagina. Awo cu e tin 28 aña di edad y tin un scol na su nomber, e tin cu duna tur e honor y gloria na Dios.
