Santa Rosa trahando pa un miho maneho di awa di Dam

For di algun siman caba Departamento di Agricultura Cria y Pesca Santa Rosa ta trahando riba diferente dam den diferente districto di Aruba. 

Awendia e damnan rond Aruba ta completamente bashi di awa. Esaki ta duna oportunidad na Santa Rosa pa reanuda trabounan di mantencion logicamente. Sacando e cantidad di tera y santo cu ta keda acumula durante añanan. Esaki ta sosode di tal manera cu durante cu tin un torencial awacero cu rooinan ta lastra y ta finalisa cu tur santo y sushi den e damnan. Cu Tractor y bobcat a haci varios di e damnan rond Aruba limpi.

A bin na un idea cu na momento cu tin awa acumula den e dam pa hiba un miho forma di maneho di uzo di awa. A yega na e conclusion pa pone un tubo cu tin un marca cu ta un midi (Meetlaat) cu tin color oranje. Esaki ta haci cu na momento cu e awa di dam ta cabando y ta tuma nota cu e midi cu e color oranje aki bin na superficie lo para cu sacamento di awa for di e dam en cuestion.

Santa Rosa ta consciente cu mester keda un poco awa den e dam pa demas fauna cu ta existi na Aruba tambe por disfruta di poco awa cu ta keda. Duna oportunidad na tur esnan cu tin e tanki blanco di 1000 liter pa por coy poco awa pa nan cultivo.

Di biaha Santa Rosa a tuma e decision pa cera e damnan poniendo piedra na e entrada principal p’asina ningun hende no tira sushi tampoco den e damnan cu ya a wordo haci limpi caba.

Damnan cu ta cera y marca ta e dam di Noord, Tanki Flip, Tanki Leendert, dam di Desha, dam di Hooiberg ta cera, Vaderpiet ta cera, y dam di Shiribana ta cera y marca.

Di parti di Departamento di Agricultura, Cria y Pesca Santa Rosa ta haci un  apelacion pa no bay kita of kibra e midi cu a pone den e damnan ariba menciona. Esaki ta pa yuda na un miho forma di maneho di e damnan rond Aruba.

Un otro apelacion tambe ta pa no bay tira sushi tampoco den e damnan of den cercania pa motibo cu na momento cu tin un torencial awacero e sushi aki cu a tira den cercania di e dam por finalisa den e dam y por tin consecuencia pa nos mesun salud.

Comments

comments