Hues a tene cuenta cu aspectonan personal rond di e acusado y como tal no a bay di acuerdo cu e demanda di Ministerio Publico. Fiscal lo kier a mira Ryson Paskel cera pa 12 aña largo pero Hues awe mainta a bah’e un tiki na 11 aña di prizon, kitando e tempo cu el a pasa caba cera. Di eynan ainda lo mester kita 1/3 parti di bon conducta, cu lo pone cu e lo ta mas o menos 7 aña cera den KIA.
HISTORIA
Un luna prome cu e asesinato, e auto di Camilo Sosa a daña y el a stacion’e dilanti cas di Paskel. Pero segun e acusado, e bisiñanan a reclama y el a move e auto na otro banda di caminda. Algun dia despues, Paskel a mira cu e auto a disparce y no tabata sa si ta Sosa a bay cun’e of otro hende.
DISCUCION
Dia 2 di september 2018, Camilo Sosa tabata riba parkeerplaats patras di Sandbar hunto cu tres amigo, ora cu Paskel a pasa banda di dje. Mesora el a reconoc’e como esun cu a horta su auto y a bay reclam’e. “Abo a horta mi auto,” asina e pelea a cuminsa tambe. Camilo a dal’e un mokete y nan a sigui bringa. Tur declaracion riba esaki ta cuadra cu otro. Dado momento Paskel a keda cu su t-shirt completamente kibra y a kita esaki. E grupo a keda cana manera den un circulo, te ora cu Paskel a dicidi di subi su auto pa bay.
Segun e acusado a declara, ora cu el a haya e sla for di Camilo, su bista a bira preto y el a haya un rabia grandi. El a subi su auto pa bay pero a bolbe 5 minuut despues y a mira su agresor riba e Parkinglot di Arawak. Riba e filmacionnan confisca, por mira con e ta baha na careda cu su man tras di lomba. Ora cu e yega cerca, Camilo ta haci intento pa wanta, pero ya caba el a propine e hinca y a huy for di e sitio.
No a logra haya e arma, pero sa cu e ta un cuchiu skerpi di ambos banda y mester ta por lo menos 15 centimeter (mita linial). El a perfor’e na su curazon banda robez ariba y su pulmon banda robez. Cu e dos perforacionnan aki, no por a haci nada pa salbe, segun rapport di Patologo.
FUGITIVO
Kico exactamente el a haci despues, niun hende sa pasobra el a disparce, supuestamente den mondi. Durante dos luna largo autoridadnan a tira diferente inval y finalmente Team di Aresto a bin detene dia 29 di october na cas di un famia na Santa Cruz. Pero hasta durante di su detencion aki el a trata di huy, sin resultado.
FISCAL
Fiscal a cuestiona cu e acusado no ta mustra duel’e di loke el a haci. E ta sinta trankil di dje y no ta mustra emocion. “Boso por mira mi cara trankil pero paden mi tin hopi problema cu mi mes y cu loke cu a pasa,” el a contesta. Mesora Fiscal a saca un potret pa mustra cu, for di den KIA, el a publica riba Instagram cu e siguiente mensahe: “Miho 10 aña dilanti Hues cu 10 pia bou tera”. Mesora el a dal cera y no kier comenta mas riba e asunto.
Fiscal a cuminsa pa splica e motibo pakico no ta proba asesinato premedita (Moord). Pa esaki e mester a tuma un decision pa comete un delito, cierto tempo a pasa cu e por a pensa riba dje, y con tur e ta bay hacie. Den e caso aki tur cos a sosode den 6 minuut di tempo. Pero si Fiscal ta haya proba cu el a actua intencionalmente (met opzet) y pa esaki e mester wordo castiga. No por papia di defensa propio tampoco. Fiscal a pidi 12 aña di prizon, pero awe Hues a bah’e un poco.
No ta conoci ainda si abogado di Paskel lo apela e sentencia di Hues awe. E tin dos siman pa dicidi riba esey.
