Fraccion di AVP a constata cu e prioridadnan den enseñansa ta completamente robes. Por mira cu ta corta den enseñansa y esey a bira un custumber. No ta duna atencion tanto na e muchanan como mayor y maestro.
AVP sa di esey, pero a realisa nan mes cu dia tras dia, mas y mas, cu p’e ultimo cinco añanan e prioridadnan den enseñansa ta completamente robes, asina Ryçond Santos do Nascimento, parlamentario di AVP a expresa. E fraccion a haya diamars mainta e noticia cu fundacion Ban Uni Man pa Cria Muchanan mester bay corta, pasobra nan tabata duna cuminda na 800 mucha. Awo a sali e noticia cu donacion a baha drasticamente y lo limita 300 mucha pa haya desayuno na scol.
E parlamentario a puntra kico esaki tin di haber cu maneho di enseñansa na Aruba. El a sigui indica cu ora di mira e necesidad di enseñansa, ta hopi importante pa corda kende ta e personanan involucra den e proceso aki. E mayor, e maestro y gobierno mester ta traha hunto pa na prome luga crea un atmosfera cu ta conduci na un bon enseñansa. Ningun mucha ta bay siña bon si nan no ta contento. Esey ta e prome cos cu mester pa enseñansa por ta exitoso.
