Un di e topiconan cu sigur prome minister di Corsou, Eugene Rugghenaat ta hopi den contacto cu prome minister di Aruba, Evelyn Wever-Croes, ta e tema di Venezuela.
El a comenta cu el a haci un chansa cu presidente Maduro a introduci nan dos.
Dicon?
Na momento cu a cera frontera na cuminsamento di 2018, Evelyn Wever-Croes tabata tin un rato chikito sinta y esey a pone cu nan a cuminsa den contacto. Asina eynan e relacion a crece di colaboracion.
Venezuela
Riba e tema di Venezuela tin diferente preocupacion cu nan tin en comun. Diferente desafio tambe, manera e parti di imigracion.
Pero cu e situacion tin un poco incertidumbre, con e cosnan lo sigui, nan ta monitor di cerca.
Prome minister Wever-Croes y prome minister Rugghenaat a usa e palabra alert, hunto cu Reino naturalmente pa wak con ta atende cu esaki, sperando naturalmente, cu no mester yega asina leu y cu di un manera of otro toch situacionnan lo trankilisa na Venezuela. Pero no tin indicacion di esey awor aki.
Ilegalidad
A keda keto bay cu e maneho di deportacion. De hecho nan ta bezig ta wak tambe con en todo caso, por atende cu ilegalidad. Di un banda, tin indicacionnan cu no solamente imigrantenan economico ta bin, pero den dje ta haya droga, arma, etc., sigur cu tin indicacion di crimen organisa of criminalidad cu ta mescla den bo comunidad. Ta algo cu tin cu wak via Siguridad Nacional.
Banda di esey, locual ta mensenhandel y mensensmokkel, cu otro actividadnan, hendenan cu ta traha ilegal, ta cosnan cu ta bay primi un tiki mas riba dje.
Apesar cu ta convivi cu e situacion penoso den e motibo cu nan ta pone cu hasta nan ta tuma riesgo di biaha bin, tin cu wak pa nos comunidad tambe. Tin cu keda evalua y sigur, mirando tambe con e desaroyonan nan Venezuela lo sigui.
Geschillenregeling
Fuera di e situacion na Venezuela, tambe lo toca tema di Geschillenregeling. Pa hopi tempo ta pasando, prome cu Rugghenaat a bira prome minister. Tabata tin reunionnan na Corsou cu no a conclui riba decisionnan final riba geschillenregeling. Hulanda ta wanta duro y kier ta baas riba e islanan keto bay. Esey ta demostra cu geschillenregeling no por keda cla.
Segun e prome minister, esaki ta un bon ehempel caminda e bon contacto cu tin cu Aruba y tambe St. Maarten, caminda via di e ministernan plenipotenciario na Den Haag, tin un frontera, caminda cu a bisa cu mester atende cu e parti di Democratisch Deficit. Mester tin alo menos un acercamento di igualdad dentro di Reino y un Geschillenregeling mester sirbi sigur e paisnan di Caribe cu tin menos forsa den representacion den e Conseho di Minister di Reino.
Tambe tin un trayecto canando caba den nos parlamentonan den IPKO entre otro y esey ta algo cu no por descarta. Pese a bisa cu mester a bay Parlamentonan, e debate mester sigui eynan y tin cu atende cu e partinan principal, of puntonan fundamental cu eigenlijk mester a atende cu e parti, entre otro di Democratisch Deficit, cu e proposicion no ta cumpli 100% cun’e.
A kere cu ta importante pa e bin, pero tin cu atende cu interesnan di e paisnan. Eynan por bisa alo menos, entre Rugghenaat y e otro dos prome ministernan, cu nan tabata di e mesun opinion eynan. Esey tambe ta kere ta algo cu tin cu bay promove mas tanto, caminda cu ta intercambia, ta delibera riba temanan di importancia cu ta na interes comun. Esaki ta un di nan, pero kier papia tambe riba desaroyo economico, riba un desaroyo duradero, cambio di clima.
E agenda ta largo, segun Rugghenaat, pero ta pasonan cut a bay sigui tuma y segun ta reuni, ta identifica e prioridadnan cu lo bay amplia mas tanto riba dje, pa e pueblonan tambe por mira resultado di e deliberacionnan aki.
Reino
E mandatario a splica, cu mescos cu Aruba y St. Maarten, Corsou no ta mira cu ta menos cu Hulanda. Nan ta partner, ta paisnan cu un status autonomo den reino y esey ta e manera cu kier trata tambe cu Hulanda.
Den su combersacion cu prome minister Rutte, a bisa cu kier atende nan negoshinan a base di respet mutuo, a base di argumentonan, a base di contenido y emocion ta cerca tin biaha, pero esey no mester ta e parti principal.
Manera cu prome minister Rutte a bisa na Corsou durante e congreso di Bon Bini, poco poco e paisnan mester bin cu un status gelijkwaardig den reino y no solamente den e parti politico, pero tambe riba e parti di bienestar, e parti di forsa economico, etc.
Si ta esey ta e caminda di cana, lo cana hunto cu nan y wak con por yega pa tin un pais mas fuerte para riba su propio pia. Esey ta con kier duna contenido na nan autonomia.
Reconocimento di cambio di presidente
For di aña pasa nan no a reconoce Maduro. Ta algo cu a papia di dje conhuntamente den Reino, aunke e tarea si ta uno di Reino. Segun e mandatario, ta evidente cu e eleccionnan di aña pasa na Mei no tabata democratico, no tabata liber, no ta conta cu participacion di oposicion tampoco. Pesey no a considera na e momento ey cu e gobierno y e presidente cu a wordo eligi ta legitimo. A mira con awor aki e pueblo Venezolano a subi caya y a exigi pa democracia. A exigi pa nan por scoge nan propio Gobierno.
No ta bay pa scoge banda politico. Ta bay pa para pa principionan cu ta importante pa nos propio pais tambe. Ta spera un biaha mas cu partidonan por haya otro y p’esey na final, si di un manera of otro toch por bin eleccion cu e pueblo Venezolano por tin e gobierno el a scoge, Venezuela, como pais, y tambe region, pa loke ta stabilidad y prosperidad, ta miho sirbi.
