Durante un conferencia di prensa recien, Rudy Lampe, ex-minister di enseñansa a indici cu durante su maneho financiero di e presupuesto di pais Aruba tabata dirigi den haci uzo eficiente di placa di pueblo, di tal manera cu tur loke ta ineficiente ta wordo re-aloca pa innovacion, pa e alumno y pa e docente.
P’esey nos por a ekipa tur scol publico cu ‘Digiboards’. Despues a logra hisa e ‘normbedrag’, despues di mas di 10 aña cu e no a subi, es decir mas placa pa cada alumno pa loke ta material di estudio y e siguiente stap tabata inverti den e docente.
P’esey Lampe e tempo ey a forma un comision y ta corda con a reuni pa prome biaha na edificio bieu ainda di Directie Onderwijs. M’a presenta e plan di Pago segun prestacion, cu mi conoce dor cu mi a traha cu ne na universidadnan den exterior.
Na Aruba docentenan cu yega na edad di 38 aña ta yega nan top pa loke ta salario. P’esey a propone pa tur docente riba edad di 38 aña ta ricibi pago segun prestacion riba nan salario.
Pa cada prestacion, manera sigui un curso online of trabao boluntario pa e scol, e docente ta ricibi tanto punto y segun e puntonan ricibi ta coresponde un aumento riba e salario. Y cada tres aña, por ehempel, ta renoba montante di e aumento dependiendo di e prestacion di e docente den e periodo anterior.
Den e ‘overdrachtsdocument’ cu mi a entrega na Minister Endy Croes, mi a skirbi cu mi plan pa futuro ta: “Investering in het personeel, voor wat betreft de introductie van een beloning naar prestatie model voor leerkrachten die de 38 jarige leeftijd bereikt hebben en daarmee hun plafond, met een systeem van tijdelijke vergoeding voor een periode die hernieuwbaar is op basis van gevolgde cursussen, vrijwilligerswerk voor de school”.
Tur esaki mi tabata planea pa introduci na januari 2023, mi a maneha mi presupuesto di tal manera pa haci esey posibel. Mescos cu mi a demostra di a hisa e ‘normbedrag’ cu ni gobierno di AVP ni di MEP anteriormente a logra di subi, anto den crisis y sigui pidi un cen extra di parlamento. Pero sindicato SIMAR a protesta, maestronan a pidi mi retiro y e votado a core cu nos y no por a concretisa e plan di aumenta e entrada di maestronan. Vooral den e temporada aki di asina hopi inflacion, un entrada extra pa nos docentenan lo tabata bonbini. Pero nos no a haya apoyo pa hisa entrada di maestronan. Tristo pa bisa, cu na Aruba so, un docente ta nenga di tin mas entrada.
