“Ced Ride ta un filosofo, e ta un poeta cu ta un cantante. Su bos a identific’e tur biaha, combina cu su letranan, cu a hacie hopi famoso”, asina e conocido locutor, presentado di radio y television y alabes promotor di eventonan musical, Ruben “Scorpio” Garcia a duna di conoce. Ayera ela dedica un gran parti di su programa na Power FM na e cantante Ced Ride, despues di a tende di su fayecimento na Corsou.
Ced Ride a fayece ayera
Cedric “Ced Ride” Ridderplaat tabata un historiado, educado, poeta, musico, pintor, escultor, escritor, compositor y areglista cantante cu tabata tin un bos inigualabel. El a nace dia 14 di juli 1944 y a fayece riba e mesun dia cu el a nace 77 aña pasa, esta 14 di juli 2021. E tabata malo y pa algun dia e tabata interna den cuido intensivo na hospital, na Corsou.
Tabata grandi desde 1960 caba
Ced Ride a cuminsa desaroya su mes den añanan 60, representando Corsou na mas di un ocacion den festivalnan di OTI y tur otro festivalnan cu tabatin. E tempo aya el a canta cu mas hombernan grandi manera George Willems, Jossy Brokke Jr. di Aruba y Humberto Nivi. Ta den e decada ey nos a conoce cantantenan cu un bos fuerte, pisa y hopi baronil. Djey el a sigui desaroya su mes.
Letra ta conta!
Ced Ride ta desaroya su letranan, como compsitor y cantante tambe, pero en especial su letra. Ta e mesun letranan aki a hib’e na participa den Festival di Tumba na Corsou, caminda cu letra ta mas importante cu e cancion. Y berdad el a haci un impacto hunto cu e banda ERA.
Su exito di mas grandi
“Pero riba tur cos, e cancion mas grandi di Ced ta Mi no kier bo mas. El a dal masha duro mes den añana 60-70, cu a duna e homber aki un nomber grandi na Aruba”, di acuerdo cu Ruben Garcia.
Un di e miho amigonan di Ced Ride ta Ike Jeserun, pa kende el a compone varios cancion tambe. Ced a biaha hopi den su bida, tambe musicalmente, y a canta na Cuba, Europa, y diferente caminata. “E tabata un señor cantante”, asina Ruben Garcia ta catalog’e.
Ced Ride ta un leyenda
Un otro cancion cu semper a sigui resona den temp’i fin di aña ta navidad sin padre, un otro exito di Ced Ride. “M’a bisa awe den mi show na radio cu ta practicamente imposibel cu hende no a yeg’i tende di Ced Ride”, asina Ruben Garcia a bisa awe. “Ced Ride ta un leyenda. Su cancionnan a bira clasico, leyenda den tur sentido”.
Hopi creativo den letra
Compara cu cantantenan di awendia, por nota un diferencia di nochi y di dia. Den mundo musical a bin hopi cambio. Ruben Garcia, cu tin 52 aña di experiencia den radiodifusion, como tal ta corda cu den decada 60 y 70, ta letra tabata manda. E tempo aya tabatin cancionnan bunita, no solamente local sino tambe internacional. “Pero cu aña cosnan ta cambia. Ya letranan bunita no ta importante mas. Awendia mester tin ritmo. E beat ta mas importante cu letra”, na opinion di Ruben Garcia.
