Despues di un periodo largo di recuperacion na Bucaramanga, Colombia, awe Ruben “Scorpio” Garcia a regresa cas. Su condicion ta hopi miho y tin hopi energia pa cana e caminda largo di recuperacion. Mas cu esey el a bisa nos “Awe bida nobo ta cuminsa”.
Dia 12 di februari ultimo el a cuminsa sinti malo, pero a opta pa no bay Dokter. Su mayan, dia 13 di februari el a haya un ataca y a keda interna na Hospital. A regla tur cos y cu Air Ambulance a mande Bucaramanga pa tratamento medico. Ey a pone “stent” pa hancha su arteria.
Banda di e operacion, e Specialista Colombiano a indik’e cu mester cuminsa un proceso largo awo di cuida curpa, di come saludabel, baha orario di trabou y haci mas movecion. Esey mester conduci na reduccion di peso y biba un bida hopi mas saludabel.
Ruben a yega awetardi hunto cu su señora Theresa y su yiu.
Ruben “Scorpio” Garcia na fin di October aña pasa a celebra su di 65 aña di bida. E ta casa cu Theresa y ta tata di dos yiu muhe y tin 1 nieto. Su carera na radio el a inicia dia 1 di juni 1970 na Radio Kelkboom, despues Voz di Aruba AM na 1976 y sigui pa Canal 90FM na 1989. El a muda pa Magic FM na aña 2002 y finalmente a bira Gerente General di Power FM. Ey e tin su programa radial ainda mainta y su programa asina popular riba diadomingo.
