Campeonato HEINEKEN fast pitch di Aruba Softball Bond dedica na baluartenan Chin Thiel ( q.e.p.d) y e trabuco Wiwi Maduro a continua riba veld di Flatstone.
Den categoria AA e fuerte equipo Royal Power Tat Fat Home Depot kende ta invicto den 6 salida a bolbe gana Macuarima Indians den di dos buelta. Royal Power 11 careda, 11 hit, 0 error y ta laga 4 coredor na base. Macuarima Indians 8 careda, 3 hit, 1 error y ta laga 5 coredor den circulacion. Como equipo Royal Power a bay di 25-11 bon pa un averahe di 440. Macuarima a bay di 17-3 pa un averahe di 176. Mihor bateadornan pa Royal Power a resulta di ta Gregory “Pilin” Krosendijk di 2-2 cu 3 rbi, Jair Thompson di 4-2 cu 3 rbi, Jomark Flanegin di 3-2 cu 3 rbi, Giandrick Lacle di 3-2, Guyon Cannister di 2-2 cu dos careda anota y Dijendrick Croes di 1-1 tambe cu dos careda anota. Pa Macuarima Indians e unico tres hitnan a bin for di e madera di Aaron Dominguez kedne a bay di 3-3 cu 2 rbi.
Jair Thompson ta bay 4 inning y dos tercio tirando 56 bola, 60 strike pa un total di 116 lansamento permitiendo 8 careda limpi propinando 7 strike outs y regalando 9 base por bola pa un ERA di 12.00 seyando e victoria riba su nomber. Jomark Flanegin ta drenta tira 2 lansamento sacando e ultimo out di e inning pa pone un wega salba riba su nomber. Pa Macuarima Indians Lucio Geerman ta perde e wega lansando 37 lansamento ricibiendo relevo di Arjen Mathilda kende a tira 2 inning y dos tercio pa un total di 43 lansamento pa finalmente wordo releva pa Juan Chirino. Den e di dos wega Balashi Premuim ta faha duro contra e equipo di Logros kendenan ta campeon di A-Klas di 2017 y a promove pa AA pa finalmente gana 8-7. Balashi Premuim 8 careda, 8 hit, 2 error y ta laga 8 coredor na base. Logros 7 careda, 10 hit, 4 error y ta laga 10 coredor na base. Balashi Premuim como equipo ta bay di 21-8 pa un averahe di 381. Logros a bati di 26-10 pa un averahe di 384.
Mihor bateadornan pa Balashi Premuim ta Ayrton Falcon di 3-3, Djurwin Croes di 2-1 y Jorge Santana di 1-1. Pa Logros a destaca na plato Norangelo Jacobs 4-2, Junior Simon, Alexander Groeneveld y Fransis Perez tur a bay di 2-1 mienttras cu Egar Bautista a bay di 3-2. Erick “Ricky” Henriquez ta bay 4 inning tirando 43 bola, 48 strike pa un total di 91 lansamento permitiendo 5 careda limpi, 3 ponche, 4 base por bola pa un ERA di 8.75. Giancarlo Gomez ta releva un inning tirando 32 lansamento pa salba e wega. Johnny Rasmijn ta tira 5 inning bon pa 102 lansamento y ta bay cas cu e derota. Weekend aki diasabra 6pm y diadomingo 11 am na veldnan na Pos Chiquito weganan femenino lo continua. Campeonato canando manera un trein cu 16 wega pa siman. Waak pa Bo tey!
