Den fin di siman a drenta e noticia tristo cu Roy Milton Harms a fayece. Ta un comerciante cu a nifica hopi pa nos economia, a inverti den temponan di menos abundancia, a percura pa hopi cupo di trabou y a yuda hopi hende den silencio. Cu e formula aki, awe su tres yiunan lo continua cu su leyenda, pa hiba e compania na e siguiente nivel di crecemento y desaroyo.
Roy Harms a nace na Aruba na aña 1932 despues cu su mayornan a regresa for di Brooklyn, New York, despues di e “great depression”. El a bira un gran deportista, a representa nos pais como hungado di baseball pa Team Aruba den e Caribbean Series cu a tuma luga na 1953.
Despues di a completa su estudio na Juliana School, el a cuminsa cu su carera na Aruba Bank y despues di algun aña, na 1956 a cuminsa traha cu su ruman homber na Harms Brothers. Na aña 1959 el a casa cu su pareha for di cual matrimonio a nace 4 yiu.
Den reconocimento di tur su logronan como un deportista y comerciante a condecor’e como miembro den e Orde van Oranje-Nassau na April 1975.
Na 1989, hunto cu su dos yiu hombernan, el a lanta Romar Freezone N.V. y Romar Trading N.V. na Aruba. Awendia e grupo di compania aki ta opera na Aruba, Corsou y Boneiro. Ademas di Romar, el a funda un negoshi di car dealership hunto cu e Moravian Church Foundation.
Ademas di su negoshinan, e tabata un co-fundado di Aruba Nautical Club, semper miembro di e comunidad protestant y co-fundado di Stichting Edmund E. Harms. Den su tempo liber e tabata un fanatico di domino y monopoly y na grandi el a gosa di mira baseball, futbol y tennis.
Roy Harms a bay laga atras su casa Maritza, 3 yiu bibo, 9 nieto y 2 bisanieto.
