Rotaract Club of Aruba yudando studiantenan via The Graduation Project

E aña escolar aki ‘The Graduation Project’ ta celebrando su di 5 edicion. Esaki ta un proyecto unda miembro y boluntarionan di Rotaract Club of Aruba ta organisa diferente sesion durante aña escolar pa yuda e studiantenan cu ta den examenklas. Esaki a wordo splica door di Presidente di Rotaract Club of Aruba Diantha.

Meta di e proyecto aki ta pa stimula, motiva y sostene e studiantenan door di duna nan tips valioso. Abraham de Veer, St. Augustinus College, Maria college MAVO, Colegio Arubano, Ceque College y Avond MAVO, ta e scolnan cu miembronan di Rotaract Club of Aruba lo ta bishitando pa duna diferente workshops durante e aña escolar. “E ta algo cu nos ta haci pa hubentud di Aruba, apoya nan pa nan gradua. Esey ta e meta di e proyecto.”

Rotaract Club of Aruba yudando studiantenan via The Graduation Project

Rotaract Club of Aruba yudando studiantenan via The Graduation Project. Click link pa mas https://24ora.tv/2MHOVlv

Posted by 24ora on Tuesday, October 15, 2019

E tema di e proyecto pa cu e aña escolar aki ta ‘Identify, Connect & Achieve’, caminda studiantenan lo identifica unda nan ta premira cu nan lo enfrenta problema/dificultad durante nan examenjaar. Alabes, e sesionnan lo yuda e studiantenan conecta miho cu nan mesun metanan pero tambe mayor y docentenan. Asina aki ta percura cu e studiante tin e sosten necesario cu sigur ta uno sumamente importante durante examenjaar.

Pa inicia ‘TheGraduation Project’, lidernan di e proyecto Bjorn Vrolijk y Rebecca Maduro hunto cu miembronan a haci bishita na Abraham de Veerschool y tambe St. Augustinus College pa asina cera conoci cu e alumnonan. Alabes duna un mini workshop unda nan a papia tocante e dificultad cu studiantenan por en contra, expectativanan pa cu e aña escolar y tambe a intercambia experencia cu otro. Mester añadi cu esaki ta e parti cu ta haci e proyecto uno bunita, unda cu un grupo di hoben cu diferente experencia ta bini hunto y intercambia esaki p’asina mustra e examenkandidaten cu nan no ta nan so.

Net prome cu SO-periode cuminsa, Rotaract Club of Aruba ta organisando dos anochi caminda mayor y studiantenan di Abraham de Veer School y St. Augustinus College MAVO ta cordialmente invita dia 15 y 16 di october na Teresita Center di 7or pa 8:30 di anochi, unda lo tin diferente invitado special presente cu lo elabora mas riba e importancia di sosten emocional y comunicacion durante examenjaar.

Un danki sigur lo mester bay na e miembro, boluntario y e comision organisatorio cu ta dedica nan tempo na e proyecto aki, como tambe e maestronan di scolnan participante pa nan cooperacion y sosten.