Rockets U17 di Sta Cruz ta derota Lady Blue Marlins di Noord

Campeonato U17 fast pitch femenino di Aruba Softball Bond a continua riba canchanan na Pos Chiquito. E equipo di Rockets di Sta Cruz a midi forsa contra e equipo Lady Blue Marlins di Noord den categoria U17. Lady Blue Marlins ta anota 2 careda den cabez di promer inning pero mesora Rockets ta reaciona cu 6 careda den bom di mesun inning. Blue Marlins ta piki un mas den di dos pero Rockets tambe ta anota uno.

Den bom di 3 inning Rockets ta rally pa 4 careda mas. Lady Blue Marlins ta keda aumenta precion y ta anota 1 careda den cabez di 4 y ta rally pa 4 careda mas den cabez di 5 inning pero ta keda net poko cortico. Boxscore final Rockets 11 careda, 6 hit, 0 error y ta laga 6 coredor na base. Lady Blue Marlins 9 careda, 9 hit, 1 error y ta laga 5 coredor den circulacion.

Mihor bateadornan pa Rockets a resulta Zulaima Croes di 3-2 cu 1 rbi mas 3 careda anota, Keeli Danje 3-2 mas 2 careda impuha y 1 anota, Zoe Barendreght 2-1 cu 1 rbi mas 1 careda anota, Joreen Rasmijn 2-1 cu 2 rbi. Pa Lady Blue Marlins a destaca na bate Angelle Thode 4-2 cu 1 triple mas 2 rbi y 2 careda anota, Ilajay Tromp 2-2 incluyendo un triple, 1 rbi y 1 careda anota, Carolina Kelly 3-1, Quioshanea Simon 2-1 cu un rbi, Zuenska Werleman 2-1 cu 1 rbi, Kelly -Ann Marte 1-1 cu 1 rbi, Maryllaine Ignacio 3-1 cual bataso porcierto tabata un triple.

Zulaima Croes ta bay henter e ruta enfrentando 29 bateador den 5 inning lansando 44 bola, 61 strike pa un total di 105 pitch permitiendo 9 careda tras di 9 hit regalando 4 base por bola y ta golpia 1 bateador y asina ta seya e victoria riba su nomber. Maryllaine Ignacio ta habri e wega y ta lansa solamente 1 tercio den promer entrada permitiendo 6 careda tras di 1 hit regalando 5 base por bola y ta resulta pitcher perdedor.

Ashanti Geertruida ta releva y ta bay 2 inning y 1 tercio tirando 24 bola, 20 strike permitiendo 5 careda tras di 3 hit y ta regala 3 base por bola golpiando 3 bateador cu bala. Por ultimo Carolina Kelly ta drenta y ta bay 1 inning y 1 tercio tirando 12 bola y 17 strike y ta permiti 3 hit sin careda regalando 1 base por bola y ta dal un bateador cu bala. All by all nos muchanan hoben femenino U17 ta hungando nan campeonato ricibiendo asina e oportunidad pa competi y desaroya nan nivel.

Campeonato ta continua diahuebs awor 12 di september pa 7pm “sharp sharp”unda Eagles lo enfrenta Rockets den categoria U17. Diabierna 13 di september pa 7pm Rockets vs Jaguars Vitamin Water AA y pa 830pm Eagles vs Aruba Bank Lady Tigers AA, diasabra 14 di september pa 3pm categoria U17 Lady Blue Marlins lo enfrenta Rockets y pa 5pm Aruba Bank Lady Tigers vs Rockets AA. Pues un total di 5 wega competirivo desde diahuebs pa diasabra awor. Fanaticada ta keda cordialmente invita pa bin apoya nos atletanan femenino. Tur wega lo tuma lugar na Pos Chiquito. 

Comments

comments