Manera cu parlamentario Rocco Tjon, lider di fraccion di MEP, a anuncia durante diferente rueda di prensa, Serlimar ta un debate cu tin cu wordo hiba den parlamento y e lo wordo hiba na Augustus venidero.
Sinembargo, segun e parlamentario, door di diferente informacionnan a sali p’afo siman pasa, masha hopi pregunta a yega cerca nan.Tjon kier a aclarea algun punto pa loke ta e topico aki.
Tarea di Parlamento
Na prome luga e kier a accentua e tarea di Parlamento. Como parlamentario, tarea ta pa analisa decisionnan cu ta wordo tuma door di gobierno, scrutina esaki, pa percura pa e decisionnan cu ta wordo tuma, ta uno bon balansa. Esey ta e tarea, uno hopi simpel. Tjon kier a splica e proceso cu lo sigui for di awo p’adilanti.
Realidad ta cu a haya un carta for di gobierno, den cual a trece claridad pa e preguntanan cu fraccion di MEP tabata tin. E carta aki ta dos punto hopi importante ta wordo treci p’adilanti.
Uno, cu e cobransa pa cual dia 1 di Juli 2018, ta wordo para y e di dos punto ta, cu lo presenta e maneho cu kier introduci pa 2019 na Parlamento na Augustus, pa asina por debati riba dje. Ta pa e motibo ey, no por debati ainda riba e topico, pasobra e maneho lo wordo presenta na Augustus. Ta importante pa splica riba ki puntonan ta bay debati na Augustus. Esey ta e area cu ainda ta causa hopi pregunta cerca pueblo. Lo bay debati riba e sistema cu kier introduci pa bay cobra pa piki sushi, pero lo bay debati tambe riba e ley.
E ley por wordo interpreta na diferente manera. Si lesa e memorie van toelichting, ta papia bon cla cu no por exclui otro companianan pa piki sushi. Na un otro banda tambe e ley ta splica cu bo por cobra, bo por pidi un vergoeding pa un servicio cu ta wordo brinda na e cliente. E pregunta cerca hopi hende ainda ta, si no ta un cliente di Serlimar, sinembargo mester paga pa nan servicio si?
E ley ta papia y bo por interprete na diferente manera. Pesey un debate mester wordo hiba riba e topico aki pa por wak di tur angulo a base di e documentonan, a base di consehonan huridico con esaki ta wordo interpreta.
Dicon esaki ta importante?
Aruba ta den un crisis financiero. Mester percura pa tur decision cu wordo tuma no lo tin su efectonan financiero pa pais Aruba. Por ehempel, kier pa e decision cu bay wordo tuma, ta esun mas miho pa evita por ehempel casonan den corte cu atrobe lo bay costa pais Aruba placa.
Un otro topico cu lo bay debati riba dje na Augustus, ta e recursonan di Serlimar. Esaki no ta conta pa Serlimar so, pero manera ta conoci tin un mocion a wordo entrega cu Augustus gobierno lo bin bek parlamento y duna un stand van zaken riba e recursonan cu a wordo aloca pa gobierno durante presupuesto 2018. Y Serlimar tambe ta forma parti di esaki.
Pakico esaki ta importante?
Laga nos bisa cu bay yega na e punto cu mester cobra. Esaki lo tin su efectonan pa presupuesto 2019. Na final di dia, si bo ta bay cobra, bo ta bay haya mas entrada. E landsbijdrage lo bay baha e ora. Ta topiconan cu tin cu bay debati riba dje na un manera sano, pa por yega na un miho conclusion.
Pa awor aki caba, organisacionnan, sindicatonan, mandatarionan, sali pafo y bisa cu esaki ta bay bira e sistema cu si bo ta cliente di un so bo mester paga pa tur dos, ta hopi prematuro.
E debate mester wordo hiba na augustus den Parlamento y esey ta e momento tambe cu Parlamento lo fiha un posicion pa e topico aki. Pa conclui Tjon ta bisa y ta sigura muy en particular e trahadornan di Serlimar, cu den ningun momento so, e ta intencion di parlamento y muy en particular fraccion di MEP di perhudica Serlimar. Al contrario, MEP kier pa Serlimar bira un organisacion sano, un organisacion cu ta bay excell. Pa bo por logra esaki, e ta importante pa e mandatario y parlamento sigura cu cada florin cu ta bay pa Serlimar wordo uza na e manera di mas eficiente y mas eficas. Ta pesey Augustus venidero, ora cu bay debati riba e topico aki, mirando e hecho cu si bo bay cobra e tin efecto pa presupuesto, kier y lo bay haci e preguntanan aki prome cu e reunion publico aki por escrito, kier mira jaarverslaag, jaarrekeningen, kier percura y den e ley tambe ta papia di e personeelsformatie. Kier wak tur e aspectonan aki pa asina, como organo parlamento por tuma e miho decision y e decision ey semper lo ta na bienestar di Serlimar y na bienestar di e clase trahado. Como fraccion di MEP, como partido ta para pa e clase trahador. No tin nodo pa tene preocupacion pa e parti ey.
