Robert Croes, presidente di Stichting Middelbaar Onderwijs Aruba (SMOA), despues di basta ora a dicidi di duna informacion publicamente di loke tabata tumando luga na Colegio Aruba. Hopi mayor cu a papia 24ora.com cu tabata LIVE for di e scol, a sinti cu tin un falta di informacion mientras cu otronan tabata bisa cu nan ta laga tur cos den man di Rectorado y Polis.
Den otro articulo ta menciona cu un biaha mas a surgi riba rednan social e rumor di un “school shooting”. E rumor aki a surgi for di diaranson caba pero e mayornan a keda den incertidumbre pasobra no tabata haya ningun informacion di kico tabata pasando.
Diahuebs henter mainta Presidente di SMOA tabata na Colegio Arubano den reunion cu Rectorado y docentenan di e scol. Na su salida el a bisa cu no a yama mayornan pa bin busca e muchanan debi na problema di siguridad. Ta un par di mucha a bati alarma y polis ta nvestigando kico esaki ta. “No tin ningun menasa nobo. Nos kier evita problema y percura pa tin siguridad. Nos tin un modus operandi nobo desde dos siman pasa, cu controlnan extra.” Croes a splica cu e controlnan aki lo keda, tin biaha den forma sporadico. E ta lamenta cu e cosnan aki ta plama hopi lihe debi na rednan social.
E ta sinti cu e tipo di actonan aki ta tuma luga net den periodo cu mester tin testnan na scolnan, poniendo hopi hende den movecion. For di diaranson tabatin comunicacion cu Cuerpo Policial riba e asunto aki. Esey ta motibo cu Polisnan tabata mainta na Colegio caba pa tene vigilancia. Pero por lo demas, e situacion ta mustra trankil. Den e caso aki a pone den accion e plan di accion preventivo, enbes di esun di calamidad. “Nos ta siguiendo conseho di Polis,” Robert Croes a bisa.
El a finalisa bisa cu e comunicacion den tur caso y pa duna e studiantenan trankilidad, ta bay di Rectorado pa e mayornan (studiantenan).
