Falta di liderazgo ta un di e motibonan principal tras di e demotivacion actual den mayoria di e departamentonan di husticia. Parlamentario Robert Candelaria di AVP a bin ta bisa e mes un cos for di basta tempo caba, cu e actual Minister di Husticia, mr. Andin Bikker, tin cu cuminsa papia cu su hendenan, scucha su hendenan, pa haya conseho, pa yud’e por lo menos purba crea un maneho. Pasobra esey awor no tin!
Locual por mira actualmente ta ripiticion di resultadonan di mal maneho y/o di NINGUN maneho! Keto bay locual ta hungando un rol y lantando basta consternacion entre Polisnan, ta e buscamento di yudansa di Militarnan, ta locual cu Robert Candelaria ta scucha hopi den e Cuerpo di Polis.
Di su banda e ta bisa cu e ta kere den traha hunto, mas tanto hende traha hunto pa yuda siguridad di nos pais ta miho, sea militar, sea otro servicionan manera Duana, Kustwacht esey semper ta bon. Semper y cuando e condicionnan y prodecuranan cu bo ta traha hunto bou di nan pa cu e yudansa, ta hopi cla entre nan cu nan. Netamente esaki ta algo cu atrobe no a sosode!
Proceduranan no ta “duidelijk” y esaki ta locual ta creando hopi confusion, mal contento y sin lubida cu e por crea te hasta peliger. Siendo cu si a crea condicionnan cla y bou di cua condicion ken ta traha cu otro, ken ta responsabel pa kico, kico ta e autoridad cu cada servicio tin, e cos no por bay robes nunca. Na momento cu bo no ta comunica, no ta percura pa hende sa kico por kico no por of ken ta bay traha hunto, bo ta haya tipo di mal contento nan aki.
Den Cuerpo Policial te dia di awe no tin claridad ken ta bay ta e hefe maximo y esaki ta debi cu e Minister no ta cumpli cu su palabracion\compromisonan. A nota momento cu e Minister a anuncia di ta bin cu un Korpschef, despues a anuncia di ta bin cu un temporal pa un aña, despues di esaki a habri procedura pa un Korpschef nobo, a cancela e procedura y na final nada no a cambia. “Nos tin un Korpsleiding cu ta onderbezet, un Cuerpo Policial hopi demotiva, cu hopi problema interno den e organisacion y den su structura, siendo e Polisnan ta keda traha tur dia duro pa percura pa tene cabes riba awa pa sigui haci nan trabou. Cu e pregunta: Cuanto mas?”, e Parlamentario ta puntra.
Sugerencia di ex Alto Inspector Robert Candelaria na Minister Andin Bikker ta, duna forma y structura na bo top, pa e resulta den beneficio pa e organisacion! Robert Candelaria ta menciona tambe KIA, cu pa mas di un aña no tin hefe. Situacion actual di e instituto ta preocupante, no tin hefe, niun hende no sa si acaso lo tin hende pa bira hefe ni tampoco no tin claridad riba e procedura con pa un hende yega pa bira hefe.
Ultimo dianan tambe a lanta hopi conmocion riba situacion pa cu Migracion, si acaso e “Dienst” ey ta bay lanta si of no, ken lo lider’e, cua ta e Dienstnan cu lo bin hunto pa cay bou di dje, kico ta su autoridad. Tambe ta menciona e hecho cu sindicatonan ta bisa un cos y trahadornan un otro cos pa e otro banda. Ta un chaos!
E Minister aki tin cu cuminsa LIDERA
Robert Candelaria a finalisa bisando cu Minister Andin Bikker tin cu asumi responsabilidad y corda cu e no ta den Parlamento mas, caminda e por a bin cu ideanan y filosofianna fofo pa tur reto. E tin cu duna liderazgo awo: Esaki mi kier, di e forma aki mi kier’e, den e forma aki nos ta ban haci’e, scucha di su hendenan y despues lanta y duna direccion. Na momento cu bo keda keto y laga cosnan keda “zweef”, awe si mayan no of warda un rato, ta resultado exacto di locual nos ta mirando awo, un husticia cu no tin direccion pasobra e Minister no ta guiand’e.
