Dia 27 di Februari 2018 College Aruba Financieel Toezicht (CAFT) a trece padilanti un reaccion na e “Uitvoeringsrapportage” di e di 4 trimester di 2017. Den e reaccion aki, pero tambe esun prome cu e ultimo, CAFT tabata critico riba e “uitvoeringsrapportages” y e asina yama “tekortnorm” segun e Landsverordening Aruba Tijdelijk Financieel Toezicht (LAft) den e presupuesto di 2017.
Dia 9 di Februari 2018 den e Uitvoeringsrapportage di e di 4 trimester di 2017, Gabinete Wever-Croes a duna di conoce cu e cantidad di FTE a baha cu 129 den e di 4 trimester di e aña 2017 den comparacion cu e di 3 trimester. Segun e reportahe, e cantidad di trahado aki cu a bay cas, tabata e personanan den servicio di e gabinete anterior cu nan contract di trabou a caba na final di e periodo di gobernacion di e gabinete anterior. Ademas, e reportahe ta indica cu e FTE aki tabata compensa cu personal nobo di e gabinete Wever-Croes. E impresion cu tin ta cu e compensacion aki di esunnan contrata ta bastante grandi.
En busca di un contesta riba e informacion aki Robert Candelaria a puntra gobierno, via Minister President, diferente pregunta riba su maneho di gasto teniendo cuenta cu e scarsedad di recursonan disponibel, entre otro e nombracion di relativamente hopi funcionario nobo y e incumplimento di e medidanan di austeridad prometi.
