Den ultimo tempo a bin dilanti diferente mensahe den media cu e Terminal nobo na Barcadera no tin suficiente capacidad pa maneha e carga na Aruba. Director di Aruba Stevedoring Company (ASTEC), Mike de l’Isle a splica cu esaki no ta cuadra cu e echonan. “Na momento di diseña e Terminal nobo, segun e rekisito nan pa cu e proyecto, mester a tene cuenta cu e capacidad actualmente necesario pa Aruba y un oportunidad pa mas crecemento den futuro”. Segun ilustracion e grafico ta mustra e uzo di capacidad di e grua durante e ultimo 14 lunanan na waf di Barcadera.
Un problema semper lo t’ey di cual tur barco ta prefera di por dicidi pa nan mes ora nan kier descarga, pero e cantidad di carga no ta suficiente pa permiti pa pone acerca un di dos grua, di cual claramente e grafieknan ta indica esaki. Por compara esaki cu Aeropuerto unda tur kier yega na mesun momento, pero no ta realistico pa construi un Aeropuerto nobo djis pa por realisa esaki.
P’esey tambe ta importante pa traha cu un schedule, yama ‘berthing reservacion schedule’, cual mester bay di acuerdo cu varios partidonan y no por modifica unilateralmente pa distribui maneho di carga cu un otro ‘berthing reservacion schedule’ na e Terminal.
ASTEC a constata cu ta sosode mas frecuente cu e barconan no ta yega na e ora stipula y despues tin cu pusha e reservacion cu otro barco cu ta haci uzo di su reservacion. ASTEC a observa cu a bira mas comun e ultimo lunanan cu e liñanan di nabegacion (scheepslijnen) ta mira Aruba como un destino flexibel den nan ruta di nabegacion cu tur consecuencia pe cadena logistica local. “Nos ta compronde cu esaki ta un problema pe suministro di nos economia, pero ta e scheepslijnen ta determina e ruta di e barconan.”
Actualmente ASTEC ta den combersacion cu ATIA pa mira con por mehora e coordinacion cu varios scheepslijnen pa evita cu e barconan lo yega na mes momento. Mirando e importancia di por duna servicio na e barconan na cualkier ora incluyendo den overtime, ta necesario cu ASTEC tin bon acuerdonan cu su empleadonan.
