For di momento cu e actual gobierno di coalicion a sinta, persecucion politico ta na orden di dia y na varios ocasion fraccion di AVP a trece esaki dilanti cuestionando e forma di procede di gabinete Wever Croes y consecuencianan serio cu e cosnan aki ta trece pa mama- y tatanan di famia.
Parlamentario Robert Candelaria di fraccion di AVP ta mustra cu fraccion di AVP na varios ocasiona a denuncia e tipo di echonan aki persiguiendo hendenan pa motibo cu nan tin un escogencia politico cu no ta cuadra cu e tres partidonan den gobierno.
“Esaki ta algo cu for di momento cu gobierno nobo asina, nos a atende e topico aki mustrando cu tin persecucion politico tumando luga, caminda ta depende di e color politico di e persona y hasta ora cu nan ta pensa solamente cu e trahado no ta sostene e tres partidonan den gobierno, e trahado por wordo persigui.
Bes tras di bes nos ta hayando informacion y confirmacion y rason cu ta kitando hende no pa nan funcionamento pero pa nan escogencia politico y ta mesun caso cu algun aña atras ora cu MEP tabata na mando, hopi hefe di departamentonan y otro funcionarionan a wordo manda cas pa motibo di nan escogencia politico.
Kisas por bisa cu mester baha e cantidad di ambtenaar cu tin den servicio l oke riba su mes no ta un ehercicio malo ya cu tur departamento mester tin e cantidad di personal cu e mester pa por duna miho servicio na comunidad pero ora cu consistentemente gobierno aki ta kitando hende pa motibo di nan color politico, nan ta wordo manda cas, e ora nos a kere cu nan ta haciendo algo robes.
Esaki nos por a mira den dianan tras di lomba di hendenan cu gobierno a manda cas caba manera di DVG, manera e caso di Marc Oduber y asina tin hopi mas caso caminda a manda hendenan cas, inmigracion y otronan y mi ta kere cu nos mester ta hopi cauteloso kico ta pasando y ta hopi critico riba esaki, ya cu pa haci e aparato publico mas chikito riba su mes no ta problema, pero ora cu ta haci’e chikito a costo di contrincantenan politico, e ora si bo ta drentando un caya hopi robes.
Esaki ta di lamenta ya cu den e grupo aki tin hendenan cu semper a sirbi nan pais corectamente y honestamente irespecto cual partido ta na mando pero lamentablemente e pensamento di e gobierno aki no ta conta y si cualkier hende tin un preferencia politico otro, e tin cu wordo manda cas.
Ta algo cu nos mester sigui duna atencion na e tipo di abuso aki ya cu aparentemente gobierno no ta preocupando su mes cu e cosnan aki pero cu tempo nan lo mira cu e cosnan aki a cosnan sumamente robes,” Parlamentario Robert Candelaria a mustra.
