“Desapunta, decepciona y engaña” ta algun di e sentimentonan expresa diamars atardi dilanti edificio di Parlamento na momento cu Polisnan a yega un biaha mas pa entrega un carta na Parlamento. E carta entrega na Presidente di Parlamento ta relciona cu e precupacion y indignacion cu ta biba entre e Polisnan pa e ley cu ta regla e reduccion salarial di ambtenaar.
Specificamente articulo 7 di e ley aki ta duna e miembronan di Cuerpo Policial e sentimento cu por perhudica no solamente nan posicion huridico den futuro pero tambe nos democracia en general. E ley aki lo haci posibel cu Gobierno den futuro por cambia salario y beneficio di empleado publico sin aprobacion di Parlamento.
E peticion den e carta ta dirigi na Presidente di Parlamento, mr. Ady Thijsen pa no laga e ley aki sin mas manera e ta pero pa trat’e den Parlamento caminda cu por tin oportunidad di vota contra di esaki.
Parlamentario Robert Candelaria cu ta bin di un background policial a para hopi biaha banda di coleganan na e otro banda, lomba pa porta di Parlamento na momento cu emocionnan escala durante manifestacion pero e biaha aki ta toca turno na Polis mes pa busca nan derecho y di cual nan tin rason riba dje.
Punto di atencion cu nan a trece dilanti ta articulo 7, cu ta stipula cu den futuro si mester bin cambio den salario un bes mas no solamente di Polis pero di tur ambtenaar, cu e lo rekeri un Landsbesluit houdende algemene maatregel van bestuur “LBham” nificando cu Gobierno mes ta trah’e y por djis busca sentimento di Parlamento pero Parlamento no por vota riba dje mas manera awor ta e caso ora kier cambia salario di empleado publico y tambe di Ministernan mes. Parlamento como representante di pueblo ta wordo poni un banda pa algo asina fundamental.
Durante su discurso ora di recibi e carta di SPA, Presidente di Parlamento Ady Thijsen a splica cu e ley ta wordo traha door di Gobierno y Parlamento ta trata esaki. Esey ta hustamente e preocupacion di e Polisnan. Esey mester keda asina. No por laga algo cu ta asina crucial manera salario di empleadonan publico y Ministers sin un voto di Parlamento. Ley ta rekeri esey caba. Aki ta trata di cartera di tur hende.
Opinion di tur cu por a combersa cu nan ta igual. Ta di acuerdo di entrega parti di salario y ta solidario cu pueblo pero e manera di entrega si mester ta corecto, husto y conforme ley. Loke ta preocupa hende mas ainda ta cu awo kier pasa un ley pa haci’e posibel pa sigui reduci salario di empleadonan publico pero ta kita e autoridad di Parlamento y ta pas’e pa Gobierno. Esaki no ta aceptabel!
Robert Candelaria ta compronde e indignacion bou gruponan di otro ambtenaarnan y gremionan den nos comunidad pasobra gobierno ta biniendo cu cambionan fundamental, pero den sin dialogo y contra beneficio general. Ultimamente e incertidumbre no ta existi solamente den Cuerpo Policial pero den tur gremio, mirando cu manifestacionnan ta na ordo di dia. Esaki ta un señal duidelijk pa Gobierno.
Pueblo ta compronde cu mester ta solidario, pero mas y mas e pueblo ta cuestiona e prioridadnan cu e Gobierno aki a pone pa atende cu e crisis. Den e situacion financiero debil y fragil cu pais ta aden awo akinan no ta momento pa duna inicio na cierto proyectonan nobo manera un pier, mientras pa falta di dialogo y comunicacion ta creando un malcontento entre trahadonan na e manera cu kier atende cu nan. Nos ta sperando un biaha mas ayudo financiero nobo drenta for di Hulanda pero atrobe Parlamento no sa nada di e condicionan cu e ta mara na e pakete di fiansa aki.
Contrario na rumannan den Reino manera Corsou y Sint Maarten, cu si a bay atende den Parlamento prome, presenta e plan y despues bay negocia cu Hulanda, aki na Aruba ta mara nos mes na condicion prome y despues ta presente pa wak e pakete manera mosterd na de maaltijd. Locual Polis a manifesta awe ta pa evita cu mañan lo bin atrobe cu sopresa financiero.
A menciona cu lo tin un reunion riba diabierna venidero cu Polis no ta informa di dje. Gobierno mientrastanto ta sigui corta tur caminda y pronto por spera cu hendenan mal contento y cu no tin di come lo bin para dilanti porta di Parlamento y ta e mes un Polisnan aki cu no ta wordo respeta aki lo bay tin mester. Pesey ta boga pa cera paz laboral y dialoga y no laga nan sinti cu ta pasando nan fastball atrobe. Nan ta expresa un malcontento cu ta fundamental y ta spera cu demas colega Parlamentario mir’e den e forma aki y sostene nan den nan precupacion pa yega na solucion faborabel y aceptabel.
