Awe por a mira basta movecion rond di facilidad di Cruz Cora y tabata trata di un grupo di hende cu ta hayando ayudo debi cu nan a keda pa e crisis di coronavirus, pa cual a perde trabou. Informacion ricibi ta indica cu Cruz Cora a cuminsa parti vouchers pa busca comestibles. Y esaki ta sosode riba cita.
Esunnan den necesidad, cu ta mas cu 400 hende, ta riba lista di e organisacion aki. Y cada dia tin un grupo ta bin tuma voucher. Esnan cu no tin forma, pero tampoco por yega na stove, ta haya ayudo for di Meals on Wheels cu ta entrega e cuminda cla te na nan cas.
E ayudo of peticion pa ayudo ta grandi y a sigui crece, compara cu na inicio di e crisis. Cruz Cora ta haya e lista di personanan den necesidad y ta bay na e cas pa combersa cu nan y haci e evaluacionnan necesario. A base di esaki ta traha e lista final di esnan den necesidad. Awo cu a haya e placa necesario for di Hulanda pa ayudo (di Ministerio di Asuntonan Interno), a cuminsa reparti entre 75 pa 80 voucher pa dia.
Si tin persona den necesidad of conoce persona den necesidad, por registra esaki online via e website di Cruz Cora. Despues di esaki ta bay haci e investigacion personal. Nan tin criterianan cu mester cumpli cu nan y manera menciona, un persona no por yega eynan y busca voucher di comestibles.
Ministerio di Asuntonan Interno a pone un suma disponibel pa Cruz Cora brinda ayudo. Cruz Cora di Hulanda ta manda un suma pa e organisacion na Aruba cu a scoge pa haci e ayudo aki via di voucher y a haya cooperacion di diferente supermercado pa pone e programa aki den practica. Ta papia aki di un suma di 4 miyon euro cu ta cubri unicamente e parti di cuminda, ya cu e gastonan operacional Cruz Cora Aruba mes mester percura p’e.
