Conseho di Minister di Reino (RMR) den nan reunion awe diabierna 27 di maart a bay di acuerdo pa aplica articulo 23 di e ley di LAft. Esaki ta nifica cu por desvia di e normanan manera ta poni den articulo 14 na momento cu e pais a experiencia daño financiero ocasiona pa un sucedido extraordinario.
Articulo 14 ta stipula e normanan cu LAft ta ehecuta pa evalua e presupuesto di Aruba. Esaki Minister Plenipotenciario Guillfred Besaril a declara na final di e reunion. E mandatario a sigui bisa cu tambe a palabra den RMR cu lo studia e otro puntonan cu e paisnan a trece dilanti pa loke ta medidanan pa combati e crisis di e Coronavirus na Corsou, St. Maarten y Aruba.
Den cuadro di esaki Conseho di Minister di Reino lo tin un reunion extraordinario riba diaranson 1 di april benidero pa delibera riba e pasonan cu mester tuma pa bin cu solucion pa e crisis na e paisnan.
