Diaranson, dia 10 di augustus tabata un dia importante p’e propietarionan di Rich’s Arubian Dish & Caribbean Delight, ya cu nan a habri oficialmente net banda di Olde Molen.
Segun co-propietario, Julisa Kruydenhof, a bin cu e idea ya cu nan tin hopi tempo riba veld di Horeca. Hopi biaha turista ta puntra kico tur ta come na Aruba, ya cu nan no kier come tur ora e mesun tipo di cuminda, manera cuminda Italiano of Mericano. Loke nan kier sa kico t’e platonan tradicional di Aruba.
Den hopi ocasion ta manda e turistanan na cierto di e restaurantnan tipico di Aruba y duna nan un tipo ki t’e platonan local cu nan por come.
UN EXPERIENCIA CARIBENSE
Door cu fo’i jong caba, e propietario Richard ta den mundo di Horeca y semper e kier a concretisa e soño aki pa bin cu un restaurant cu tin cuminda local, no solamente di Aruba, pero tambe Caribense, esta fo’i Corsou, Surinam, Venezuela, Colombia, Jamaica, entre otro. Tambe tin cuminda Mexicano eynan, ya cu riba diamars nan tin Taco Tuesday.
Ya fo’i 5:00 pm por pasa y purba e platonan local y e delicianan Caribense te cu 11:00 pm. Cushina ta cera pa 10:00 pm. Door cu e restaurant ta consisti di un bar, tipo ‘half moon’, tin e parti paden, cual ta un tiki mas elegante y tin e parti pafo tambe, cu lo bira mas tipo sportsbar. Den fin di siman (diabierna y diasabra), lo ta habri te cu 1:00 am p’e hendenan por dal nan drinks.
UBICACION
Manera cu Kruydenhoff a menciona, e area caminda cu e Rich’s Arubian Dish & Caribbean Delight ta situa, ta cerca di Olde Molen, cual por cierto tin cu enfatisa no ta un club nocturno mas. Pronto e lo habri bek den un restaurant. E area aki tambe a bin hopi negoshi nobo, caminda cu turista ta bishita. Por mira hopi turista for di e otro hotelnan ta bin cerca.
E luga tambe ta hala atencion, pasobra tin hopi pintura bunita cu tin di haber cu Aruba, manera e anker, e mata di Divi Divi, etc. y tambe un cas tradicional di Aruba.
SPECIAL
Rich’s Arubian Dish & Caribbean Delight tin un loyalty card. Dilanti tin tur informacion di e restaurant como tambe e QR Code cu pro scan. For di eynan por bay riba e website unda cu por mira e menu, cual ta hopi varia. Cada biaha cu bin e restaurant tin di bin cu e carchi unda cu por firma of stempel y rib’e di seis bishita, ta haya 25% di descuento riba e menu completo.
INVITACION
Julisa Kruydenhoff ta haci un invitacion na Aruba henter pa bin y purba e sabor Caribense como tambe e sabor local. Tambe ta invita tur bishitante di Corsou, ya cu pronto lo tin plato tipico di Corsou.
“Bin purba,” ta loke el a indica.
PRIJS
Kruydenhoff a splica tambe cu nan a haci nan investigacion prome cu nan a pone nan prijs. No kier concentra solamente riba turista. Semper e ta bisa cu mester cuminsa prome cu nos localnan ya cu nan t’e sostenedonan di mas grandi. For di dia cu nan a tene nan soft-opening, basta hende local a bin y a gusta.
Awo particularmente cu nan a habri oficialmente, nan lo tin 10% di descuento p’e localnan riba henter e menu. Ta invita un biaha mas Aruba henter, vooral e famianan pa bin pasa un rato contento, ameno, disfrutando di nan dushi platonan local.
