Fraccion di AVP a ricibi via Reuters e anuncio cu Fitch Ratings a saca unda nan a mantene e rating di Aruba na BBB minus, pero nan a baha e outlook di e proyeccionnan financiero y economico p’e proximo añanan riba termino mediano pa uno negativo. Fraccion AVP ta mustra nan preocupacion riba esaki den e ultimo siman nan y nan a vocifera esaki den nan preguntanan riba presupuesto 2018. Parlamentario di Fraccion AVP, Sr. Richard Arends, ta indica cu esaki ta un muestra di falta di vision, te hasta falta di conocemento di maneho financiero y maneho economico. Esaki ta loke e Fitch Ratings a constata y ta confirma den nan anuncio
Textualmente nan ta bisa cu e normanan cu Aruba a acorda cu Hulanda, cu ta e normanan cu e ley di supervision financiero ta prescribi, lo no wordo alcansa den aña 2018. Como cu e desviacion di loke gobierno anterior a stipula ta asina grandi, e ta mina henter e credibilidad di e maneho financiero. Tur esaki ta poni textual den e informe cu a wordo publica internacionalmente. Basicamente nan ta conclui cu e “Financieel-Economisch Memorandum” no ta duna nan e confiansa, no ta duna nan e comodidad necesario pa mantene e outlook stabiel.
E parti economico tambe nan a trece dilanti, e materialisacion di e crecemento economico pa loke ta trata e termino mediano. E parlamentario ta señala cu nan tin duda y esaki ta refleha di cual den e ultimo tempo Fraccion AVP ta bisando. Esaki ta falta di proactividad pa loke ta trata e maneho economico, e ta hopi bisto. Durante bishita di FitchRatings nan Aruba, fraccion di AVP a trece e puntonan aki di preocupacion dialnti
E fraccion di AVP ta lamenta cu esaki a yega asina leu. Na momento cu a introduci un medida manera ta e aumento di BBO y BAZV cu 2.5% y asina mes alcansa unicamente un norma di 3%, cual norma Aruba a yega caba 2 pa 3 aña pasa, y ta asina extende e balance budget, como tambe e momento cu e debe lo cuminsa baha. El a sigui indica cu esaki ta algo cu a premira pa cuminsa na aña 2018 y Gobierno actual a opta pa extende esaki pa 3 a 4 aña mas aumentando e debe cu mas di 300 miyon florin tambe durante e periodo aki. Esaki ta un di e puntonan cu Fitch Ratings ta trece dilanti.
Fraccion di AVP a ricibi e confirmacion ta cu gobierno actual ta negociando pa CAFT keda permanentemente. Esaki ta algo cu Fitch Ratings ta confirma y sigur esaki ta preguntanan cu e fraccion a hasi den cuadro di tratamento di presupuesto 2018. E presupuesto aki no ta uno completo. Di un banda e pakete di medida ta sigura. Sinembargo e pakete di compensacion, manera entre otro aumento di reparatie toeslaag como tambe e reduccion di e prima di AZV p’e pensionadonan y otro puntonan di maneho, no ta aparece bek den e presupuesto.
Richard Arends a señala cu nan a haci casi mil pregunta y desafortunadamente nan no a ricibi contesta riba mayoria di nan. Fraccion di AVP lo haci e preguntanan un biaha mas durante e reunion di presupuesto cu ta cuminsa diahuebs cual ta un lastima si di berdad kier fortalece posicion di Parlamneto como organo halto di estado. Loke Fitch Ratings a trece padilanti ta confirma e insiguridad cu tin den sector priva pa loke ta trata e maneho financiero economico. Esaki ta traduci su mes cu empresarionan ta bay pospone nan inversionnan, pero tambe e consumo priva lo bay disminui. Esaki lo materialisa su mes den falta di crecemento economico, cual ta algo cu nos no por uza aworaki combina cu falta di proactividad p’e pilarnan principal di economia di Aruba. Esaki ta pone un presion hopi mas grandi riba e outlook riba termino mediano. Den e dianan nos dilanti lo trata un presupuesto incompleto, un maneho financiero cu no ta duna siguridad, cu no ta duna credibilidad. Esaki ta no algo cu unicamente partido AVP, fraccion di AVP, of Parlamentario Richard Arends ta bisa, pero Fitch Ratings ta confirma e onvoldoende di e maneho financiero Gobierno a presenta.
