Durante aña escolar 2017/2018, alumnonan di Prinses Amalia Basisschool a traha hunto cu Aruba Tourism Authority pa medio di e programa di ‘Raad van Kinderen’ pa asina formula solucionnan riba e pregunta / dilema: con Aruba Tourism Authority por percura cu Aruba ta sobresali riba tereno/area di servicio? Recientemente, A.T.A. a bishita e scol pa amplia riba esaki.
E asina yama ‘Raad van Kinderen’ ta un iniciativa di Prinses Laurentien di Hulanda bao di e fundacion ‘Missing Chapter’ y Unicef den cual muchanan di scol ta cera conoci cu diferente industria y organisacionnan, cu ta duna nan un dilema pa nan resolve. A base di e dilema cu A.T.A. a formula pa e zesde klas di Prinses Amalia Basisschool, a haci uzo di diferente metodo y a formula preguntanan necesario pa yuda cu e dilema. For di eynan e proceso ta sigui, resultando den un serie di recomendacionnan cu A.T.A. lo ricibi for di e alumnonan di zesde klas.
Pa e di tres aña consecutivo, A.T.A. ta forma parti y ta inverti den e ‘Raad Van Kinderen’ na Aruba pa conscientisa hobennan y asina amplia conocemento di e industria turistico y laga hobennan participa activamente den loke ta e pilar di nos economia esta e industria turistico.
Presente durante e bishita di A.T.A. tawata Ronella Tjin Asjoe-Croes – CEO Aruba Tourism Authority, Patrick Melchiors DSU Manager A.T.A. – y Isha Tapias-Kock, Product Specialist A.T.A cu a topa, sinta y scucha e grupo di alumnonan riba nan recomendacionnan pa cu e dilemma ‘Con Aruba Tourism Authority por percura cu Aruba ta sobresali riba tereno/area di servicio?’
A tuma e oportunidad pa comparti mas di loke ta come y bebe den e industria aki, por medio di un presentacion, unda a comparti entre otro e importancia di turismo pa Aruba, kico e tarea di A.T.A. ta y pakico A.T.A. ta mercadea Aruba den exterior. Tambe a otorga na cada alumno un copia di e buki ‘Benchi cu Lina’, cu ta un produccion di A.T.A. unda e alumno ta siña mas di Aruba y nos turismo pa medio di diferente ehercicio.
Por bisa cu e proyecto aki tawata uno exitoso te cu awor. Como tal A.T.A. ta sigui sostene e programa aki y lo sigui traha hunto cu Prinses Amalia pa asina haci di e proyecto aki uno exitoso e aña aki tambe. Por ultimo A.T.A. ta gradici e cabesante di e scol, e maestra di e klas pa nan colaboracion.
