Manera ta conoci, den oranan di marduga, personal di Kustwacht a intercepta un tugboat bao di nomber Gracia, cu tan nabega bao di bandera di Samoa. E tugboat aki tabata 2 miya na cabes di Aruba. A abord’e. El a sali dia 9 di october den careda 3’or for di Cartagena, unda a bisa cu nan ta biniendo Aruba, pero ningun momento a meld na Aruba cu nan ta bay drenta.
Sinembargo a top’e ta nabega den e zona di cabes di Aruba y a abord’e y bin cun’e pa 5’or di mainta na waf di Playa. Eynan a cuminsa cu un investigacion. Abordo nan a bin topa cu mas cu 80 bulto di droga, cu tabata abordo di e embarcacion aki.
Te awor aki ta mustra cu ta un cantidad di cocaina. Na e punto di sosten di Kustwacht na Savaneta, nan a logra baha tur e droga for di tugboat Gracia y asina bay over pa nan wordo distrui. Lo pis’e prome. Ta papia riba 2 mil kilo di droga cu a haya. Esaki ta un sla hopi fuerte pa baho mundo y cu un balor hopi grandi mes.
Na Europa e droga aki tin un balor pa cada kilo, entre 50 mil pa 80 mil euro. Esnan cu haci un calculacion por saca afo con grandi e balor di e droga aki ta riba mercado Europeo. Un pabien ta bay na autoridad di Aruba. E departamento di Kustwacht tabata tey, Aduana, Polis, K9 brigade di polis y cachonan di justitie BOT K9. A detene cinco persona y tur cinco ta Venezolano.
