Tur aña na november, tin un evento gigantesco di beachtennis cu normalmente ta tuma luga na Eagle Beach. E aña’ki esaki no lo bay ta asina. E biaha aki e ta bay ta na Mambo Beach (ex Bushiri Hotel). Segun minister di Salubridad Publico, Deporte y Turismo, Dangui Oduber, a converti e area aki den un beach publico. Gobierno a drecha e beach, a pone santo blanco, ta bay crea facilidad, pone espacionan di parkeo. Crioyamente bisa, un beach pa pueblo.

Fase uno ta cla, segun minister Oduber. E minister ta contento cu gobierno ta sostene e evento di beach tennis, por medio di fondonan di ATA, cu ta e sponsor principal di e evento, cual ta uno sumamente exitoso.

Evento di Beach Tennis lo bira e evento deportivo mas grandi na Aruba

Evento di Beach Tennis lo bira e evento deportivo mas grandi na Aruba. Click e link pa mas https://24ora.tv/2pjoTgA

Posted by 24ora on Monday, October 14, 2019

Despues di e evento aña pasa a drenta den combersacion cu e comite organisador, a plantea e idea pa muda e evento pa Bushiri. Eagle Beach tabata un luga hopi exitoso pa añanan largo pa e organisadonan. A splica e pensamento y intencionnan di gobierno pa drecha Mambo Beach y si nan ta dispuesto, den cooperacion, sintando na mesa, pa muda e evento di Eagle Beach, bin cun’e Bushiri. Despues di un proceso basta largo di negociacion, deliberacion, varios reunion, hunto cu Beach Tennis, Ministerio di Turismo, Ministerio di Infrastructura, DIP, DOW, a yega na un acuerdo pa muda e evento aki pa e venue nobo cu lo bira Mambo Beach (Bushiri).

Awor aki ta bezig cu e proyecto di Baby Beach fase uno, caminda cu pronto lo tin e groundbreaking oficial. Eynan tambe lo amplia e beach, caminda antes tabata Lone Palm Stadium, cu tabata wordo uza pa hunga softball. Door cu ta bay bin e proyecto di hotel, lo amplia e beach y lo pone santo blanco. A pone fondonan disponibel pa cumpra santo blanco pa Baby Beach y e santo blanco cu a resta, a ubica na Mambo Beach.

Gobierno ta contento cu e organisadonan di Beach Tennis a bay di acuerdo pa muda e evento di Eagle Beach pa Bushiri. Awo Eagle Beach a bira liber bek pa comunidad y turistanan.

E evento aki ta e “E” evento deportivo mas grandi cu tin na Aruba, internacionalmente. E aña aki lo bay conta cu 1400 participante internacional di en total 42 pais. A compronde tambe cu ESPN tambe lo transmiti e evento aki. E cobertura cu lo haya internacional, e reconocimento cu lo haya, ta un balor agrega den nos turismo.

Controversial

Inicialmente e tabata hopi controversial pa muda di Eagle Beach pa Mambo Beach, segun Sjoerd de Vries di Beach Tennis. Pasobra Eagle Beach ta considera como e beach mas bunita di mundo, cual ta e consenso p’afo.

Hende tabata hopi skeptico cu nan lo muda pa Bushiri. A sinta traha un plan y awor aki tur cos ta bira bon. Awor aki ta promove e luga nobo pa Beach Tennis y internacionalmente tur hende ta full cu respet y increibel. E reaccion ta hopi positivo y ta prome biaha, unico na mundo, cu un beach ta wordo estableci pa un evento di beach sport (beach volley y beach tennis).

Normalmente ta bay wak un beach y ta organisa e evento. Bo tin loke bo tin. Awor aki tin un beach specialmente pa un evento di beach tennis. Ora cu e evento tuma luga, ta muda bek. E evento no ta keda eynan.

Tambe de Vries, a splica cu nan tin e Waste Management Budget mas grandi despues di carnaval. Cada dia, henter dia, Serlimar, cu ta partner di Beach Tennis, t’ey pa haci e beach limpi. Tur dia ta cuminsa cu un beach limpi y esey ta importante. Ora cu ta cla cu e evento, e beach lo keda mesun cos cu prome cu a cuminsa. Algo asina ta super importante pa e organisacion. Hopi hende ta biniendo Aruba pa disfruta di e evento. E lo bay ta un exito. Inscripcionnan ya ta cla caba. Aki por mira un otro record. Tambe e ta un evento di comunidad. Sjoerd ta invita tur hende aki na Aruba pa bin gosa. E evento aki ta un special y ta full habri. Entrada ta gratis, parkeo ta gratis. Aruba Aloe ta sponsor entertainment. Tur anochi tin musica en bibo. Djis bin gosa cu tur hende di mundo, cu ta bin Aruba otro luna pa gosa cu beach tennis. Esaki lo converti un otro mundo na Bushiri.

Ayudo di APA

APA ta bay yuda cu parkinglot. Antes na Eagle e tabata hopi fastioso pa parkeo. E aña aki APA ta habri su portanan caminda cu por staciona e autonan y no mester crusa caminda pa bay e evento. Asina aki ta hopi mas facil. Eagle Beach a bira chikito pa e evento. Tabata tin 36 cancha riba Eagle Beach y no tin mas luga. Na Bushiri ta 24 mil meter cuadra, caminda cu por pone 50 cancha. E aña aki e lo ta un record. E unico mas grandi ta na Rio de Janeiro, pero pa awo, esun na Aruba ta mas grandi.

E fechanan

E apertura lo ta dia 8 di november y pa 9 dia largo, lo bay tin torneo. Hende di exterior ta keda 9 dia na Aruba. Diabierna anochi lo bay tin un apertura hopi grandi y ultimo anochi lo ta dia 17 y semper lo bay tin nan famoso after final party.

Feedback internacional

E feedback cu Aruba a logra tabata uno hopi positivo pa loke ta e comunidad internacional. E organisacion ta kere cu henter e mundo di beach tennis lo ta na Aruba. Ainda e ta chikito. Pero si Beach tennis bira olimpico e mundo di beach tennis lo crece. Aki na Aruba, tin e World Series y automaticamente Aruba lo bira famoso den e mundo di beach Tennis, segun Sjoerd de Vries.

Comments

comments