Prome Minister Mike Eman ta considera cu e discusion riba e ley pa aumenta salario minimo mester inclui e impacto cu pobresa ta teniendo riba famianan y hobennan na Aruba. Segun Eman, mehora poder di compra di trahadonan mester ta un compromiso carga ampliamente den e coalicion.
Den un entrevista, Eman a indica cu e ta mantene contacto cu su coleganan na Aruba tocante e progreso di e deliberacionnan. El a menciona cu ta trahando riba ideanan pa medidanan complementario, conoci como flankerende maatregelen, cu por contribui na e siguiente pasonan den e proceso di e ley.
Eman a enfatisa cu e necesidad pa subi salario minimo y fortalece poder di compra no mester wordo considera solamente como un tema di AVP. Segun e, ta importante pa e coalicion sigui delibera y busca un base amplio pa hiba e proposicion padilanti.
Pobresa tin consecuencia pa henter comunidad
E Prome Minister a recorda cu, durante e combersacionnan pa forma gobierno, diferente instancia a señala pobresa como un di e problemanan principal di Aruba.
Segun Eman, e consecuencia di esaki ta bay mas leu cu e situacion financiero di un trahado. El a relaciona pobresa cu famianan kibra, muchanan cu ta bandona scol y problemanan entre hobennan, incluyendo criminalidad.
Pa e motibo ey, Eman ta considera cu e debate no por limita su mes na salario y economia so. E ta pidi pa inclui tambe e impacto social y e tipo di comunidad cu Aruba kier construi.
Yamado na doñonan di trabou
Eman a expresa e speransa cu doñonan di trabou tambe por tuma distancia di e calculacion di gastonan directo pa contempla e panorama mas amplio.
Segun e, ora ta evalua e costo di un aumento di salario minimo, mester considera tambe e costo cu pobresa y problemanan social ta representa pa Aruba.
Den su rasonamento, no actua pa mehora e situacion por termina costa e pais mas, particularmente si esaki ta contribui na mas pobresa, discordia y famianan kibra.
E Prome Minister a expresa confianza cu personanan cu ta stima Aruba ta dispuesto pa reflexiona riba loke ta bon pa e pais. Su yamada ta pa sigui e deliberacionnan cu un mirada amplio, den cual husticia social, poder di compra y bienestar di famianan ta ocupa un luga central.
Nada ainda
Eman a señala tambe cu Minister Geoffrey Wever a keda di presenta alternativanan pa e proposicion di aumento di salario minimo. Sinembargo, segun e Prome Minister, te na momento di e entrevista ainda no a presenta e alternativanan aki. Eman a enfatisa cu e deliberacionnan mester sigui, pasobra e aumento di salario minimo y e mehoracion di poder di compra mester conta cu un sosten amplio den coalicion.
