Meteoro, un compania cu entre otro ta huur wc-nan portatil, tambe a pasa den e crisis di COVID-19 pero e propietario Renzino Gomez no a sinta keto. Pa e motibo ey tambe cu awo cu negoshinan a habri dia 18 di mei ultimo, e tabata cla pa brinda su servicio manera semper.
Meteoro como un eenmanszaak ta cay bou di loke Gobierno ta considera PPP’ers y tabata por a aplica pa un suma pa kwartaal. Sinembargo mirando cu tabatin un bruhamento pa e compronde e diferente programa, e no a perde tempo cu esaki y a prefera di concentra pa mira con e por lora man den e temporada dificil.
E por a bisa cu su compania a sufri un sla duro. Na inicio di aña el a haci un inversion grandi den su ekipo, pero nada di esaki no a yuda pasobra e material a yega laat, despues di temporada di carnaval. Ora cu el a spera di por recupera esaki den temporada di campamento, esaki tambe a cay na awa debi na e crisis di COVID-19. “Den tur esaki mi a perde di haya un entrada di rond di 65 mil florin,” Gomez a conta.
Na momento cu crisis a cuminsa, el a sigui den operacion poco poco te ora cu a para construccion por completo. “Mi no a para keto. Mi a concentra pa bira inventivo. Mirando cu ta exigiendo labamano y na Merca e prijsnan a bay hopi halto, el a dicidi di ordo e pompnan y e mes a construi e labamanonan aki. Aworaki mi tin 20 di nan na huur,” el a conta. Tambe el a constata cu reglanan internacional ta bisa cu e WC-nan portatil tambe mester tin labamano y e tin tur esakinan prepara.
E ta yen di energia cu awor e negoshinan a habri. “E plannan ta grandi. Nos a drecha y mantene nos ekiponan. Nos compania ta bon prepara pa sigui y no a perde cliente.”
