Meteo ta alerta pa biento duro y lama bruto awe

1539

Departamento Meteorologico di Aruba (Meteo) a caba di emiti un alerta pa biento duro cu ta drenta na vigor awe merdia 12:00pm y lo keda valido te cu awe tardi 6:00pm. Tambe ta adverti cu lama lo ta bruto na costa parti oost te noordwest.

Un aumento leve di diferencianan di presion di aire den region di Caribe lo provoca un biento mas fuerte. Biento lo supla de bes en cuando cu 22 te 27 nudo y ta anticipa cu rafaganan lo por alcansa 35 te kisas 40 nudo (beaufort 8).

Ta urgi usuarionan di lama pa tene extra cautela ya cu e biento duro lo causa lama mas bruto. Adicionalmente un aviso pa boto chitkito ta drenta na vigor awe tardi 6:00pm pa partinan oost te noordwest di area na costa y lama habri en general.