En konekshon ku e kaso di asesinato ku a tuma lugá djaluna dia promé di yanüari 2018, alrededor di 00.40’or, riba e lugá di stashoná outo di ántes “Veneto Casino Beach Resort”, situá riba Pater Eeuwensweg, polis ta bolbe pidi yudansa di komunidat. Riba e dia en kestion e hòmber Tayler Zuhayr de Lima, nase na Kòrsou dia promé di yanüari 1998 a bin pèrdè su bida, debí na tirunan ku el a risibí for di arma di kandela.
Te na e momentunan aki e investigashon ta ketu bai tumando lugá i den e afan pa yega na un solushon di e kaso, Ministerio Públiko a hisa e montante di rekompensa di sinku mil florin pa dies mil florin antiano, pa esun ku por duna e tep ku por hiba na klaridat i solushon di e kaso di asesinato aki.
Pa duna tep riba e kaso aki, por yama e number anónimo di polis 108. Kuerpo Polisial i Ministerio Públiko ta konta riba yudansa di komunidat pa por solushoná e kaso aki tambe.
