Djadumingu 21 di aprel 2019 alrededor di 15.32 or di atardi, Sentral di Polis a dirigí un unidat polisial pa Playa Forti, pa un posibel kaso di hogamentu. For di investigashon a sali na kla, ku un hòmber ku tabata den laman dado momentu a hañ’e ku difikultat den awa i a guli bastante awa.
Personanan ku tabata den boto riba laman a saka e hòmber aki for di den awa i tres’e kantu. Personal di ambulans ku a yega na e sitio a kuminsá ku reanimashon di e víktima, i a transporté ku urgensia pa poliklínika di SEHOS pa mas tratamentu. Alrededor di 17.10 or Sentral di Polis a risibí informashon ku e hòmber Giovanni Migdonio Quirindongo, nasé na Kòrsou dia 23 di desèmber 1963, a fayesé.
