Recherchenan rabia cu ta manda nan di cashi pa muraya: Nan kier nan propio luga

Diaranson mainta, recherchenan di Playa a dicidi cu ta basta y a tene un walkout pa un ora, demostrando asina cu nan ta cansa di e situacion cu nan ta aden. Ta trata di 13 recherche cu ta sinta pega cu otro den un espacio chikito na warda di Macuarima. Pa falta di espacio awe tin tur e cuerpo di recherche gespart tur caminda den diferente warda.

Nan no por traha den un luga compacto traha pa nan pa nan pasa algun dia di trabao. Mientras tanto nan tin hopi tempo gespart tur rond na diferente warda riba nos isla, pa motibo cu nan ta wardando riba un otro warda.

Omar Kock, presidente di sindicato SPA, a comenta cu nan a wordo acerca pa e departamento di Recherche di Playa cu e notificacio cu nan no por traha asina aki mas. E ta hopi dificil pa nan por cumpli cu e demanda tin riba nan departamento, vooral e casonan cu ta pasa den e parti di Oranjestad.

Nan ta haya diferente reclamo cu e hendenan no ta logra yega. Di mes tin cu bay duna keho na Playa. Ora cu bay warda di Playa, ta avisa nan pa bay na Warda di Shaba, pasobra recherche tabata eynan un tempo.

Di repente nan no por a keda ey mas, nan a bay Macuarima. E hendenan ta wordo manda di cashi pa muraya.

Reclamonan a cuminsa drenta na departamento di recherche y esaki a pone cu diamars atardi a drenta un reclamo cerca hefe di un otro departamento di gobierno y a pone cu nan a bisa cu ta basta y no por cumpli cu e demanda asina aki. Cada biaha nan ta depende di espacio cu tin disponibel na Macuarima. Nan tin cu warda riba beurt pa nan por atende cu publico y sospechosonan. Esey ta pone cu awa a pasa hariña y a dicidi di sali afo.

Otro localidadnan

Ta pagando huur di un edificio na Wayaca cu ta bashi y tambe den Frankrijkstraat, cu nan no a bay bek aden. E edificio na Wayaca, esun di KMPG ta un edificio cu nan lo ta destina pa bay aden. Awo nan kier urgi gobierno pa aloca e placa pa nan por caba di drecha e edificio, pa asina nan por drenta y eherce nan trabao.

Ta dos luna pasa cu nan a sali for di Frankrijkstraat, pa motibonan ya conoci, cu ta pone cu nan ta bula “van de haak naar de tak”.

Ta pidi gobierno pa ubica e fondonan necesario pa caba di drecha e edificio unda KMPG tabata.

A notifica tur hende

Departamento di Recherche mes a notifica leiding riba e asunto. Diamars anochi Kock tabata combersa cu alto comisario y a splik’e kico ta e intension di e walk out y alabes a haya un cita cu Alto comisario pa por sinta cun’e pa mira con lo tackle esaki.

Kock mes no a bay mira e edificio di KPMG y aparentemente e trabao mes no a tuma luga. E ahustacionnan cu mester a tuma luga, no a tuma luga.

Rol di minister di husticia

E rol di mas grandi ta pa aloca e placa necesario pa por caba di drecha e luga y pa e recherchenan drenta. Esaki ta djis pa e warda aki. Tin entendi cu seccion surveillance mester bay Wayaca tambe, pero den un otro edificio. Eyden surveillance Oranjestad mester bay den un futuro cu no ta suppose di ta mucho leu y esey tambe ta leu di cla. Esey ta un otro motibo pakico no por haci nada na e edificio. Ta compronde cu un verbouwing no ta costa poco, pero no ta keda na e polisnan pa haci’e. Gobierno mester pone e cen disponibel pa esaki.

Otro departamentonan

Tin mas departamento cu a bin Macuarima, por ehempel Atraco Team, departamento di RRT. naturalmente di loke nan a bay laga atras, compara di loke nan tin awor aki ta hopi chikito. Macuarima ta dispone di luganan pa verhoor e victima y sospechosonan, pero no pa tanto departamento.

Loke e departamento di recherche di Playa ta haciendo, ta haci afspraak cu e denunciantenan. Den un palabra, recherche di Playa ta haci afspraak cu recherche di Santa Cruz pa haci uzo di e pida luga pa por interoga.

Reunion cu Alto Comisario

Awo tur cos ta keda di e reunion cu nan lo tin cu Alto Comisario, pa despues mira ki pasonan e sindicato lo tuma pa loke ta e situacion di recherche Oranjestad.