Miembronan di sindicato di Douane SADA a yama su miembronan pa un accion diaranson mainta. Esaki a causa cu e Departamento ta practicamente plat. Tur esaki relaciona cu e decisiondi Gobierno, Minister di Finanza Xiomara Ruiz Maduro, pa no respeta e Salarishuis acorda den un Convenant dia 21 di juli, 2017.
Dilanti e edificio unda e oficina di Douane ta situa riba L.G. Smith Blvd e miembronan a bini hunto den oranan tempran di mainta. Eynan Edward Maduro a splica un biaha mas pakico e miembronan a dicidi di bay den accion pasobra no por acepta cu Gobierno ta hala atras riba algo cu tabatin un palabracion caba. Mas ainda pasobra e mandatario un luna atras ainda a sigura nan cu respeta e acuerdo menciona.
Mientras cu nan tabata na e sitio, a cuminsa drenta informacion cu Gobierno (Minister) tin pensa di cuminsa cu un caso sumario pidiendo Corte pa ordena e Douaneronan pa reanuda trabou di inmediato. Te cu rond di 11’or di mainta sinembargo sindicato no a haya confirmacion cu tin un caso sumario entabla y nan no a wordo yama door di Gobierno tampoco.
Minister no tabata sincero y ta haci promesanan falso. E miembronan ta haya cu e mandatario a claba nan un cuchiu den lomba. Mas ainda despues cu Prome Minister mes a bisa cu e acuerdo ta uno legal.
P’esey despues di a haya confirmacion cu no ta ehecuta e convenio manera a bisa pa dos aña largo, e miembronan a fada. E miembronan a dicidi cu lo sigui cu accion te ora haya un contesta.