Manera por a tuma nota di ayeranochi caba, awe mainta Sindicato Aduanero di Aruba (SADA) a bay den accion y no lo reanuda trabou te ora Gobierno concede na e acuerdo firma dos aña pasa. Ta lamenta cu SADA cada biaha ta recuri na welga como
instrumento primordial pa yega na loke nan ta exigi, sin tene cuenta cu e consecuencianan
grandi cu esaki tin pa Aruba.
Un paro den e trabou di Duana ta resulta den paro total den entrada di productonan necesario pa comunidad y nos pilar economico cual ta turismo. Ademas ta crea retrasonan den schedule di barconan cu mester baha nan carga na Aruba, resultando den costonan halto adicional.
Ta berdad cu ta cada sindicato tin e derecho di pone forsa y exigi cumplimento cu derechonan laboral, pero semper y cuando considerando proporcionalidad y den e situacion economico precario cu Aruba ta aden aworaki, ta inaceptabel cu ta pone presion adicional riba nos economia door di corta e ader principal di Aruba su economia.
ATIA a manda un carta pa SADA awe mainta, urgiendonan pa pone un paro na e accion aki y reanuda trabou pa no causa mas daño na nos comercio y comunidad.
