Un bon trabou di recherche encarga cu ladronicia di cas a conduci na desmantela un banda di ladron cu tabata plunder cas. E cas ta di un turista cu ta pasa algun luna na Aruba y algun luna na Merca. Dia a horta na e cas a bay cu un van shinishi y un Jeep Wrangler color berde.
Esey tabata den e cura. Djey nan a drenta e cas y plunder e cas completo. Ora e turista a yega Aruba prome siman di januari a bin topa un cas bashi. A avisa autoridad mesora. Team di recherche encarga cu ladronicia di cas a cuminsa tira bista pa un Wrangler. Diadomingo mainta riba 20 di februari a tende di un Wrangler berde cu marduga tabata basta activo. Sea activo cu hit and run of esnan den e auto kier a bringa cu hende.
Riba trip nan a causa basta problema. Polis di Santa Cruz a bay nan tras. A cuminsa persecusion caminda e Jeep Wrangler berde A-21397 tabata core di Santa Cruz direccion Shete. Durante huymento a dal tambe. Un wiel a ranca y asina mes el a sigui cu tres wiel. Subiendo e sero di Shete e trip a caba. Polis a detene tur tres y confisca e Wrangler. A resulta cu e Wrangler ta esun horta na Malmok. Team Woninginbraken hunto cu Recherche San Nicolas a haci un entrada hudicial diadomingo na un cas na Kadushi Largo y na uno na Shete.
Na e percela na Shete a bin encontra mayoria di articulonan horta y e Jeep Wrangler cu a wordo horta for di e cas na Malmokweg.
Na Kadushi Largo e bin encontra e Van Chevrolet.
A detene 3 homber di inicialnan:
D.D.S. naci na Aruba di 19 aña
E.J.W. naci naci na Aruba di 19 aña.
G.J.K. naci naci na Aruba di 39 aña.
A confisca tur cos. Cu takelwagen a transporta tur cos horta. E talelwagen no tabata suficiente. A haci uso di pickup di polis tambe. Tur cos a bay warda di polis na San Nicolas. Un pabien na team special di recherche cu apenas un siman ta desmantela dos banda di ladron y confisca hopi cos horta.
