E post di Brandweer bieu ta bay ta den renobacion y ta p’e motibo aki mes a dicidi pa bay Scol di Polis na Lago Heights.
E mudamento aki tabata necesario pa asina por cuminsa cu e renobacion grandi di e kazerne cu tin por lo menos cuarenta aña bieu sin haya un bon mantencion. Ta un trabao cu lo bay dura cuater luna di trabao intensivo y manera cu nan keda cla, e bomberonan por conta cu un edificio renoba, cla pa sigui opera hopi aña mas.
Pero den comunidad tabatin varios pregunta, dicon a opta pa bay asina leu y no den un punto mas central manera Pos Chikito.
Davni Roza, presidente di sindicato di e bomberonan SINBA, a comenta cu a busca varios luga pa dos siman largo entre otro na IMSan bieu y nobo. Tambe na ex-Springfield Supermarket. Tambe nan a bay na edificio di FTA, Hulpbestuurskantoor na San Nicolas, Postkantoor, Ward’i Balashi, Ward’i Polis na San Nicolas tambe.
E problema tabata cu e edificionan cu ta afgekeurd unda auto ta para. Unico opcion cu tabatin di parti di minister di husticia tabata scol di polis, cu ta un bon luga y ta cera, caminda cu e autonan por keda paden como tambe e autospuit, pa asina no perde e materialnan cu tin.
Minister Rocco Tjon, di husticia y asunto social, a anuncia e inicio di e renobacion di e luga, cual ta un proyecto grandi cu un inversion di 1,6 miyon florin pa percura cu e post aki di bombero por ta renoba por completo. Lo tene cuenta tambe di coriente, un sistema avansa pa loke ta camara, p’asina garantisa siguridad di e empleadonan. Den otro palabra e lo bira un post di brandweer nobo.
Pa un cobertura mas amplio lesa TREMPAN.
