Riba diadomingo 27 di maart ultimo Kiwanis Club of Aruba (KCA), e service club cu ta existi desde 1964, a organisa un torneo di golf caritativo na The Links at Divi Aruba. E evento a conta cu 19 hole sponsors como patrocinador principal y cu un gran cantidad di hungado di golf. E torneo tabata completamente ‘sold out’.
Cu e fondonan recauda e aña aki, lo haci un donacion na Fundacion Hunga Teca y tambe na e programa Jump 18. Hunga Teca ta un fundacion cu ta fungi como un ‘speel-o-theek’ cu ta fia muchanan co’i hunga educativo y alabes ta organisa dianan di wega, unda muchanan hunto cu nan mayornan por siña cu wega. Jump 18 ta un programa multidisciplinario pa combati y preveni obesidad di mucha hunto cu e mayornan, bou guia di diferente profesionalnan medico.
Vikash Karnani, miembro di KCA y presidente di e comite di recaudacion di fondo a comenta: “Nos ta masha orguyoso di locual nos a logra post-pandemia. Nos ta gradici tur nos hole sponsors, sponsors di rifa, socionan loyal y tambe e ekiponan di golf cu a yuda nos realisa nos meta y nos ta spera di por yuda lo mas posibel cu e sosten cu nos a ricibi di e organisacionnan fantastico aki”.
Jokoeza Hooplot, Presidente di KCA, ta añadi: “E torneo di golf ta un di nos eventonan mas importante pa por recauda fondo pa e club anualmente. Nos ta hopi contento pa mira cu nos evento emblematico tin un sosten grandi y continuo den sector priva y companianan semi-gubernamental. Ademas, tur nos miembronan di KCA, socionan y ekiponan di golf, por a disfruta di un dushi ambiente durante e torneo y e ceremonia oficial di clausura di e evento”.
E ganadonan oficial di e torneo 2022 ta:
- Best Gross: Team Ortho Clinic Aruba; Patrick Haime, Evan Haime, Zerzinho Croes y Randy Mark Helgers
- Best Net: Team Rasputin; Pierre Rafini, Greg Martis, Giovanni Atencio y Elvin Maduro
- Longest drive female: Alexandra Ismail-Brown
- Longest drive male: Axl Ismail
- Closest to the pin: Ricky Ingrassia
Kiwanis Club of Aruba ta existi desde 21 di november 1964 y tin como meta principal pa mehora e bida di muchanan na Aruba. Ta realisa esaki door di organisa diferente proyecto pa recauda fondo, trabounan boluntario y proyectonan di concientisacion. Pa mas informacion tocante Kiwanis Club of Aruba por fabor bishita www.kiwanisclubofaruba.org of nos pagina riba Facebook.
