Digno pueblo aunke e ehecucion a para temporalemente, gerencia di AAA asina yama Leadership Team tin e plan diabolico di retira ±50 persona adicional cla caba.
Cu tur respet pa stranheronan di bon curason ta bin cu buena fe pa traha honradamente y contribui na nos pais un biaha mas nos ta wak cu 2 stranhero haragan pa placa y sin respet alguno pa nos Aruba ta encabesando e plan aki pa wordo ehecuta cueste loke cueste.
E dos stranheronan aki ta e director y e hefe di recurso nan no tin ningun sentimento en lo absoluto pa e pueblo di Aruba e unico meta di nan ta pa corta gasto unda cu ta y cueste lo que cueste semper y cuando ta a costo di e personal pero no di e leadership team. Ultimo aki e mes un director a expresa cu no ta responsabel pa wak kiko lo ta bay ta e situacion financiero di e personanan cu lo wordo kita pero pa wak pa e situacion financiero di e compania. Pa tira salo den e herida tin yiunan di tera den e leadership team y cu no solamente ta permiti e plan criminalnan aki formula contra nan propio pueblo pero ta contribui cu e plan sushi y baho aki.
Con boso por tin cuero di cara di yama boso mes Arubiano? Con boso por biba cu boso mes sabiendo cu loke boso ta planea pa hasi ta inhusto y moralmente condenable paso boso ta bay pone yiunan di tera boso propio pueblo den situacion nan financiero devastador inecesario paso AAA tin placa pa ta solidario cu su empleado nan. Dicon no ta aplica e asina yama “afspiegelings beginsel” den e leadershipteam? Nan a segura nan puesto from day one y tur otro empleadonan tin mas cu tres luna den un stress psycologico pasobra nan ta den un incertidumbre.
Mayoria di e leadership team tin sea auto di compania of auto toelage y tur otro sorto di toelagenan esakinan ta adicional di nan salario astronomico. No solamente nan plan diabolico ta encera di kita hende pero esnan cu keda nan kier duna mas trabou sin ahusta salario y riba dje nan lo mester bay di acuerdo pa otro beneficionan secundario dus nan lo bai rebaha den esaki nan tambe. Schiphol su contract tambe lo wordo recorta? E contractnan di consultants tanto di Schiphol y NACO tambe lo wordo corta, incluyendo placa di cas, auto y flight tickets? Tanto e director, hefe di recurso humano y e resto di leadership team cu otro high and mighty team no ta compronde cu un restructuracion na un airport na Hulanda no tin un impacto socio economico pa Hulanda manera e tin pa nos pais Aruba y e motibo ta cu Hulanda ta un tiki mas grandi cu Aruba y posibilidad pa empleo ta hopi mas grandi.
Trahadornan y pueblo en general mester cuminsa cu accion di firma pa exigi e retiro di e director y di e hefe di recurso humano. Nos no por sigui laga stranheronan bin trapa y abusa di nos hendenan. Nos mester cuminsa exigi respet.
