Arubaanse Voetbal Bond (AVB) a bin cu algun cambio y durante conferencia di prensa a presenta nan. E clubnan conoce e cambionan aki caba. Pa loke ta e cambionan aki, esakinan mester a bin caba di basta tempo.
Randolf Lacle, presidente di Arubaanse Voetbal Bond, a splica cu dia 21 di juli a informa durante e reunion general dje cambionan. E cambionan aki tabata aproba door di e reunion general. Ta hopi importante pa AVB sa cu e clubnan ta aproba e cambionan aki. Dia prome di augustus e temporada a cuminsa oficialmente y a haya cu esey tabata momento pa informa publico di esakinan.
FIFA – Connect
E prome cambio ta e digitalisacion di e registro di hungadonan como tambe e digitalisacion di e administracion di campeonato. Aña pasa den luna di october 2021, a tuma contacto cu FIFA pa por a cuminsa cu un sistema pa registra hungado como tambe maneho e campeonato. FIFA – Connect por ofrece esaki, gratuitamente na tur federacion cu ta miembro di FIFA.
Na e momento aki, caba ta den proceso pa registra e hungadonan y di e forma aki tambe tur hungado miembro di AVB ta haya un FIFA ID number. Pa ora di wega tambe ta elimina e formulario fisico (dus papel) y por manda e line-up pa e wega digitalmente. Esaki ta introduci entrante den e Campeonato 2022/2023, cual prome wega ta dia 9 di september.
FIFA + (FIFA Plus)
Bentaha grandi di FIFA Connect ta cu e alineacion lo bira conoci mas trempan. Locual ta sumamente importante pa e siguiente cambio cu lo introduci pa e Campeonato 2022/ 2023.
Na luna di december 2021, AVB tabata tin un reunion cu representantenan di FIFA. Aki a informa cu AVB tabata pensando riba un manera cu por haci e campeonato un manera mas atractivo y tambe pa e campeonato por cuminsa genera fondo. Na e momento ey a informa pa reuni cu Dave Roberts, pasobra e tin un plataforma nobo nobo pa cuminsa yuda e federacionnan genera fondo for di campeonato. Specialmente pa locual ta e derechonan di data, data rights.
FIFA+ ta un app, cu ta free pa download tanto via Google Playstore como via Apple Store. Lo no uza Facebook y Youtube, pero FIFA+. Riba TV si por sigui wak e weganan ta bay via Nos Isla TV Canal 23.
Sistema di Campeonato
Pa 2022/2023, manera a informa anteriormente caba, lo cambia e sistema di campeonato. E idea ta pa tin mas wega competitivo, mas wega decisivo y cu tin mas wega interesante.
AVB a forma un comision pa revisa e Sistema di Campeonato. E comision consistiendo di Michel Lopez, Ditto Acosta, Carlmichael Bikker, Shayna Harms y Randolf Lacle. A discuti varios scenario y tambe a reuni cu varios stakeholder e.o. for di comercio, media etc. y a tuma tur e informacion ey y a yega na e siguiente concepto.
Pa mas lesa TREMPAN.COM.
