Ministerio di deporte a informa riba e avansenan regardando e proyectonan di renobacion di facilidadnan deportivo. E proyecto di turf artificial na veld di Kudawecha tin varios tempo andando y por bisa cu esaki ta den su fase final.
Awor por mira cu a nivela e veld di Kudawecha y a instala un “drainage system”. Tur esaki pa mehoracion di infrastructura di e veld. A renoba e dugout tambe y ta cla pa haci uzo di dje.
Manera ta conoci caba, na aña 2019 veld di Kudawecha a ricibi lusnan LED. Pues dentro di poco deportistanan tin un veld completamente renoba pa continua cu nan deporte.
Minister Dangui Oduber ta keda enfatisa cu deporte ta un instrumento importante pa nos pais. E ta percura pa entre otro un bida mas saludabel, tanto fisico como mental, e ta tene hobennan leu di delincuencia y ta siña nan disciplina. Sin deporte, un nacion no tin bida.
Minister Dangui Oduber a demostra caba di tin deporte na pecho, a haci inversionnan necesario y pa e siguiente termino di gobernacion tin e compromiso pa sigui traha na bienestar di deporte.
