E proyecto subsidia door di Tourism Product Enhancement Fund (TPEF) di Aruba Tourism Authority, ta planea pa termina den 2 fase. E prome fase a inicia na februari di aña 2019 y awor e di dos fase ta casi cla pa entrega. E proyecto tabata necesario pa “upgrade” e area.
Boardwalk Malmok ta un proyecto cu prome cu eleccion di 2017 Minister Dangui Oduber a priminti di lo bay construi pa esunnan cu ta haci ehercicio tin un area bunita y sigur pa nan train y alabes e ta stimula comunidad pa haci movecion.
E boardwalk Malmok ta cuminsa for di e crusada pa bay Arashi te cu e area di Fisherman Hut. E prome fase di e proyecto a consisti di 240 meter di “hard hout” y a haci uzo di klinkers tambe. A pone palonan cu reflectors cu ta separa trafico di peatonnan pa e siguridad necesario y a crea areanan di parkeo.
Durante e ultimo fase a construi den e area di peaton, un vloer di concreet sigui pa un vloer di klinker cu kolomnan, a pone mas iluminacion y a construi un boardwalk na altura di e Fisherman Hut. Tambe na e draaikom na altura di Fisherman Hut a construi un plateau di trafico cu lo conecta cu e caminda di Malmok.
