Actualmente no tin claridad pa loke ta trata e dialuna, 15 di februari, cu a decreta como dia liber. Esaki ta loke cu presidente di Camara di Comercio, Omar Tromp, a bisa den un declaracion na prensa.
El a splica cu riba e calendario 2021 di dianan oficial di fiesta / conmemoracion cu DAO a publica riba su website, e fecha di 15 di februari ta figura como uno tentativo ya cu a pospone e parada grandi di carnaval 2021, pero no a fiha un fecha nobo.
Sinembargo, riba dia 28 di januari ultimo, minister di Labor y Asuntonan Social y DAO, a anuncia cu 15 di februari, apesar cu no tin parada grandi di carnaval, ta y lo keda un dia festivo.
E anuncio aki, segun Tromp, a trece confusion,tanto pa e dunado di trabou como tambe pa e empleadonan. Den ley ta stipula cu e dialuna despues di e parada grandi di carnaval ta un dia liber, pues ta referi specificamente na e parada grandi di carnaval. En bista cu lo no tin parada grandi den e proximo dianan, ta implica cu no tin un base legal pa considera dialuna, 15 di februari como un dia liber. Cualkier cambio y/of adaptacion di e ley mester cana via e proceso huridico normal cu ta tuma su debido tempo.
Segun e informacion cu Camara di Comercio a ricibi, no a cana e proceso aki, pues no tin ningun peticion pa cambio di e ley.
Camara di Comercio y Industria (KVK) ta lamenta e manera con minister di Labor a atende cu e asunto aki door di tuma un decision incorecto y contra ley cu ademas no a dialoga riba dje y sin previo aviso ta impone esaki riba sector priva. “E tipo di accionnan aki sigur no ta contribui na aceleracion di e proceso di recuperacion di nos economia, ya cu hustamente den e periodo dificil aki ta sumamente importante pa negoshinan por keda opera mas normalmente posibel,” tabata palabranan di Omar Tromp.
