Awe diabierna mainta, Polis a laga e hoben L. Petrotchi den libertad, despues cu Gohierno di Evelyn Wever y Otmar Oduber a acus’e di ladronicia di pertenencianan di sala di prensa di Gobierno. Nan a detene diaranson anochi na su apartament den Julianastraat y a bay cu un tas di un camara bieu cu su amigo a fi’e di masha aña atras.
Petrotchi a splica cu e tin masha tempo cu e no ta traha den media mas. El a studia y e siman aki a logra su diploma como chauffeur di ambulance. E ta traha henter dia y diferente warda. El a keda masha sorprendi ora dos recherche a yega 11:45pm na su apartament y detene.
Nan a puntre pa ekiponan di saca potret y el a mustra nan su camara di dje y un camara bieu cu su amigo a fi’e di masha tempo y cu no ta uzando mas. E camara ta di mas cu 8 aña bieu, pues prome cu Gobierno a sinta mes. El a splica autoridad durante interogacion cu e no ta ladron y no tin necesidad pa horta nada di ningun hende.
Polis a bise nan ta kere ta un kibocacion y nan a lage bay.
Ta mustra mas cla awor cu e caso completo ta basa riba redashi y persecucion politico. Solo di Pueblo a skirbi cu nan a haya “cientos” di ekipo scondi den e apartament chikito ey, cu obviamente no ta berdad. Gobierno ta buscando ekiponan perdi hopi leu, kisas nan mester mira mas cerca den coalicion…..pasobra e supuesto ekiponan “perdi” kisas ta mas cerca cu nan mes ta pensa!
