Durante e ultimo Concierto Dominical Donny Laclé di e aña aki atrobe tabatin un ambiente masha dushi y alegre. Un audiencia grandi y masha anima a gosa di un bunita programa di Pasco.
Mayra Kock-Garrido a habri e mainta cu diferente grupo. A presenta un coro di IPA y Coro Femenino Cantare, cu ademas di canticanan di Pasco a presenta tambe “Aña Nobo” y “Tumba Moderno” di Rufo Wever pa comemora cu dia 8 di december ta cumpli 100 aña cu Rufo a nace. E solista Maria Eugenia Peña a canta “Edelweiss” y Brenda Rasmijn, a trece e cantica “Pasco na cas”. E duonan Melixa y Joann Werleman a canta “The Wexford Carol/ The Snow Lays on the Ground” y Elizabeth Pope y Clyde Milliard a cosecha hopi exito cantando “You can trust God.” Durante e pausa cu a sigui 5 miembro di Fundacion Donny Laclé pa Hoben Talento Musical a entrega 16 scolarship na studiantenan di musica talentoso pa nan por sigui les di piano, guitara, drums, percusion y baho na Scol di Musica Rufo Wever y pa Melixa Werleman kende ta tuma les di canto y siña lesa muziek cerca Mayra Kock-Garrido. Tambe pa 5 cantante cu ta haya les di canto via skype cerca un cantante profesional na Merca. Ta trata di un suma total di 17.536 florin. Tur luna nos a ricibi placa den e caha di glas di e bishitantenan y nos a ricibi tambe ganashi di e benefit concerts cu Carlos Bislip a organisa. Nos ta kere cu hopi hende a sinti un satisfaccion grandi, sabiendo cu nan donacion di tur luna ta yega cerca nos talentonan hoben di musica.
E parti musical a sigui cu un grupo ya conoci pa hopi di nos: Norman Arends y su amigonan Ilse Tjen-A-Kwoei y Robert Solognier, compaña pa e cantantenan Nilka Franka, Percy Jeandor en Wim Steenhuis, y tambe riba guitara Kelvin Flores, Nicolaas Kock, Sylvia Martinus, Benjamin Petrochi y Roy Sneek. Nan a pone tur esnan presente compañanan, cantando un potpouri di cantica di Sinterklaas. Nilka, Percy y Wim a interpreta entre otro e canticanan: “Navidad y Año Nuevo”, “Felices Pascuas”, “Regalo di Pasco”, “Hoog daar aan de hemel” y un potpourri “Cantemos.” E publico a duna nan un aplauso fuerte pa nan bunita presentacion. Den e caha di glas cu a pasa rond despues, esnan presente a demostra di ta aprecia e Conciertonan di tur luna y mas ainda nan deseo di yuda nos talentonan cu nan donacion.
11 guitarista y 11 voz a clausura e mainta: Rondalla “Universo di Aruba”, bou guia di Frank Croes a sa di crea un ambiente di fiesta den Café Musical y pone hopi hende subi pista, tocando canticanan di Pasco bailabel. Y Roberto Orman a pone e cherry riba e bolo ora cu, manera tur aña, el a canta “Dandé”, deseando tur hende un feliz aña 2018.
Finalmente e MC a gradici tur persona cu durante aña 2017 a coopera cu e Conciertonan Dominical. Dirigente y personal di Biblioteca Nacional, Ray cu ta percura pa e garganta no seca y e stoma no gruña. E grupo di voluntario cu tur diasabra merdia ta bin prepara e sala: Haydee, Rita, Wim, Wina, Ilse y Erwin. Danki tambe na prensa cu dos biaha pa luna ta publica nos comunicadonan. Un danki special na tur e musiconan cu durante e aña aki a crea un dushi ambiente cu nan musica, anto sin cobra. Johnny Croes cu 2 biaha pa aña ta prepara un parti di nos concierto. Y last but not least na tur esnan cu ta bishita e conciertonan tur luna y ademas ta yuda ruim op tambe . Masha, masha danki. Fundacion Donny Laclé for di awo caba ta desea henter pueblo di Aruba feliz dianan di Pasco y un aña 2018 yen di felicidad y hopi salud.
E proximo Concierto Dominical lo tuma luga riba 25 di februari 2018.
