Gobierno di Aruba ta expresa solidaridad cu Venezuela y ta prepara pa brinda asistencia humanitario
Gobierno di Aruba a expresa su profundo solidaridad cu e pueblo Venezolano despues di e fuerte temblor cu a dal Venezuela y cu a causa un gran cantidad di victima y daño material, specialmente den e area di La Guaira.
For di oranan trempan di mainta, Prome Minister Mike Eman a reuni cu director di Crisis Management Office (CMO), Rino Hermans, Altocomisario di Polis (KPA) Ramon Arnhem y Susan de Lange di Veiligheidsdienst Aruba (VDA) pa evalua e situacion y coordina e prome pasonan cu Aruba por tuma.
Despues di e reunion, Gobierno a establece contacto cu e Consul di Venezuela na Aruba, cu e Embahadora di Reino Hulandes na Caracas, Carmen Gonsalves, y cu e diferente instancianan den Reino pa ricibi e informacion mas actualisa y determina di ki forma Aruba por brinda apoyo.
“Nos ta expresa nos solidaridad cu e comunidad di Venezuela, cu e pais Venezuela, y al mesun momento transmiti Aruba su voluntad pa asisti den cualkier forma cu asistencia humanitario,” Prome Minister Mike Eman a declara.
Segun e informacion cu Gobierno a ricibi, e area di La Guaira ta entre e luganan mas afecta y e cantidad di fayecido ta sigui aumenta. E embahadora a informa cu tur personal di e Embahada Hulandes a salba di lo pio. Dos colaborador a perde nan cas pa motibo di e temblor fuerte, pero te na e momento aki no tin ningun indicacion cu tin Arubianonan afecta.
“E siguiente 48 ora ta hopi crucial pa tin buskeda y rescate profesional pa atende e personanan cu ainda por ta bou di e edificionan cu a cay den otro,” Prome Minister Eman a indica.
E Prome Minister a bisa cu Aruba ta den contacto cu e autoridadnan competente den Reino pa determina kico Aruba por haci pa yuda Venezuela. El a recorda cu Aruba tin experencia cu asistencia humanitario despues di desaster natural, incluyendo e apoyo cu a brinda na Haiti despues di e temblor na 2010.
“Nos tin e experencia y nos ta prepara pa bai duna Venezuela asistencia, specialmente den e buskeda y rescate di personanan cu por ta bao di e edificionan cu a cay den otro.”
Prome Minister Eman a expresa tambe su solidaridad cu e comunidad Venezolano na Aruba, reconociendo e incertidumbre cu hopi famia ta bibando.
“Nos kier expresa nos palabranan di solidaridad cu e comunidad Venezolano na Aruba. Mi por solamente imagina con hopi famia ta bibando den inkietud den e momento aki.”
Tocante e reapertura di e conexion aereo cu Venezuela, e Prome Minister a indica cu e situacion actual a caba di wordo evalua den Conseho di Minister diamars pasa.
“E tema aki ta cay ayera den Conseho di Minister. Nos lo evalua si e plan original pa reanuda e buelonan ainda ta posibel cuminsa prome di augustus, mirando e estado di aeropuerto di Maiquetia. Si e circunstancianan permiti, e conexion aereo pa asistensia humanitario por wordo habri inmediatamente.”
Pa asistencia y informacion, CMO ta disponibel na 588 0100. Directie Buitenlandse Betrekking por wordo contacta na 583 4705 y e Embahada Hulandes na Caracas na +58 21 22 76 93 00.
Gobierno di Aruba lo sigui monitore desaroyo di e situacion di cerca y lo mantene comunidad informa tan pronto cu tin mas informacion oficial.
