E reportero di TeleCuraçao, Gunnar Zimmerman, a comparti su orguyo p’e manera cu e nomber di Curaçao a resona na Kansas City. Durante su estadia pa cubri e seleccion nacional, Zimmerman a biba di cerca con e localnan ta reconoce y saluda e delegacion di e isla, demostrando cu e bista di mundo ta poni riba Corsou.
Hunto cu su colega Scharbaay, Zimmerman a dicidi di cana den e caya grandi, caminda habitantenan local tabata identifica nan jersey. “Nan ta pasa pita ‘Corsou’. Nos a bay come, nan ta cuminda nos, nan sa cu ta Corsou,” e reportero a relata. Pa Zimmerman, e bista internacional aki ta un gran oportunidad pa turismo: “Nos mester echt wak con nos ta acapara tur e turistanan aki. Ban haci mas probecho di henter e situacion aki.”
E ambiente den stadion tabata electrico, specialmente ora e fanaticada a uni den un solo grito. “Ora bo tende “Sigui move Corsou, sigui move” riba un suspiro y eybanda bo ta tende nan grita ‘ECUADOR’, bo curason ta hala cera. Ta un feeling hopi dushi mes,” el a splica, accentuando cu e experiencia aki ta bal la pena maske bo hinca bo curpa den debe.
Pa loke ta e parti deportivo, Zimmerman a resalta e spirito di e fanaticada. Maske a perde 7-1 den e prome partido, e celebracion a sigui pasobra e seleccion a bora Neuer. “Pa bo bora Neuer, bo mester ta echt un bon hungado.” Despues di e empate 0-0 contra Ecuador, e enfoke ta riba e proximo partido pa avansa di buelta. “Si nos coy un punto mes, un gol mes pa mi, ta suficiente. T’aden ta conta,” Zimmerman a conclui.
Pa mas detaye lesa TREMPAN.
