Dia 24 di juni ta un dia grandi, caminda cu Aruba ta celebra Dia di San Juan, conoci tambe como Dia di Dera Gay.
E aña aki, mescos cu a haci durante e temporada di Pasco, unda c’un caravana a recore varios bario di Aruba, Dia di San Juan tambe un caravana a pasa den varios bario di Aruba y termina na San Nicolas, na Carnival Village.
Marko Espinoza, Hefe di Prensa di Gabinete AVP-FUTURO, a indica cu pa hopi tempo no a experiencia e ambiente di Dera Gay asina di cerca. Bushiri, Dakota, Mabon, grandi y chikito a celebra Dia di Dera Gay. Tabatin hasta personanan di otro cultura, cu tambe a uni nan mes n’e celebracion aki p’asina brasa e cultura di e pais cu a acoge nan. Tabatin competencia di Grito di Gay, Grito di Galiña y hasta por a tuma nota di hoben- y chikitonan tambe a participa e Dia di San Juan, Dia di Dera Gay.
Dera Gay ta hopi popular den e barionan di Noord, Savaneta y Santa Cruz y CCDN hunto cu Unoca a trece e celebracion aki mas cerca di e pueblo.
Si a haci apelacion pa no cende candela, no trece peliger pa niun habitante di nos dushi isla y celebra e dia aki na un forma ameno.
Parlamentario di AVP, Otami Thomasia tambe tabata t’ey n’e celebracion hunto cu su yiu chikito. P’e ta importante pa su yiu lanta ta conoce nos cultura y pa e siña mas di dje.
