Directie Volksgezondheid (DVG) ta invita comunidad pa reflexiona riba e evento natural cu a tuma luga ayera tardi, ora un temblor fuerte di magnitud 7.0 y 7.5 tabata registra den region di Venezuela. Afortunadamente, Aruba no a sufri daño tampoco efecto di esaki pero e situacion aki ta recorda nos cu calamidadnan por sosode sin aviso.
E pregunta importante pa cada ciudadano ta: bo ta suficientemente informa y prepara pa sa kico pa haci si un calamidad asina afecta Aruba un dia?
Pensando riba e salud, siguridad y bienestar di comunidad, DVG tin un seccion special riba su website cu yama “Calamidad.” Den e seccion aki, comunidad por haya informacion practico, consehonan util y accionnan cu mester ta tuma prome, durante y despues di diferente tipo di calamidadnan.
Entre e temanan trata tin:
• Temblor di tera
• Tsunami
• Horcan
• Candela den cas
• Enfermedadnan infeccioso
• Preparacion di un emergency kit
• Numbernan di emergencia y otro informacion importante
DVG ta curasha tur residente pa tuma un momento pa bishita website di DVG y familiarisa nan mes cu e informacion disponibel. Preparacion ta cuminsa cu conocemento.
Bishita www.dvg.aw y busca e seccion “Calamidad” pa lesa mas.
Calamidad no ta avisa. Informa nos ta miho prepara.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda e-mail na [email protected].
